Nazım Shıhalıev: Qazaq - ​óte meıirban, meımandos, kishipeıil halyq

KÓKShETAÝ. QazAqparat - Qazaq halqy - ​ óte meıirban, meımandos, kishipeıil halyq. 1-shi Naýryz - Alǵys aıtý kúni «Ázerbaıjandar qaýymdastyǵy» respýblıkalyq qoǵamdyq birlestigi Kókshetaý qalalyq fılıalynyń tóraǵasy Nazım Shıhalıev qazaq halqyna alǵysyn bildirdi, dep habarlaıdy QazAqparat tilshisi.

Nazım Shıhalıevtiń aıtýynsha, búgingi kúni táýelsiz Qazaqstan kópulttylyǵymen qosa, birligi jarasqan, berekesi molaıǵan el retinde baǵalanady. Ásirese, elimizdi meken etken oı-maqsaty ortaq sanalýan ult pen ulys ókilderiniń biri - ​ ázerbaıjandar.

«Ázerbaıjandardyń Qazaqstanǵa kelý tarıhy da ártúrli. Men ózim 1952 jyly Ázerbaıjannyń Masaly aýdany Shatyroba aýylynda dúnıege keldim. Keıin KSRO-nyń Іshki ister mınıstrligi bergen joldamamen 1970 jyly Qazaqstanǵa qonys aýdardym. Otan aldyndaǵy boryshymdy da Almaty oblysynda ótedim. Sóıtip, osynda tamyrymdy tereńge jaıyp, qalyp qoıdym deýge bolady. Qazir ınternatsıonaldy otbasynyń otaǵasymyn. Áıelim - ​orys ultynyń ókili. Nemerelerim de osy qazaq jerinde ósip, qazaqsha tálim-tárbıe alýda. Muny óz basym bári qazaq halqynyń darhandyǵy men peıiliniń keńdiginiń arqasynda der edim. Búgingi tańda baýyrmal qazaq halqymen birge ózge de ult ókilderimen qatar tatý-tátti ómir súrip jatqandyǵymdy maqtan tutamyn», - deıdi ol.

Nazım Shıhalıev Qazaqstandy óziniń ekinshi Otany sanaıdy.

«Qazaq halqy - ​ óte meıirban, meımandos, kishipeıil halyq. Tipti, en dalada kele jatyp, kóligiń toqtap qalsa da, jaqyn jerdegi aýylǵa soǵa qalsań, seni jyly úıge kirgizip, aldyńa qolyndaǵy baryn tosyp, qutty qonaǵyndaı kútedi», - deıdi Nazım Shıhalıev.

Sonymen qatar, ol Astanada ótken «Nur Otan» partııasynyń kezekti XVIII sezinde aıtylǵan Prezıdenttiń áleýmettik bastamalary ultymyzdy uıystyra otyra uly maqsattarǵa, bizdiń ulttyq ıdeıamyzdyń túp qazyǵy «Máńgilik elge» aparatyn dańǵyl jol ekenin atap ótti.

«Memleket basshysy aıtpaqshy, bizdiń táýelsizdigimiz, zaıyrlyǵymyz ben elimizdiń ekonomıkalyq ósimi ulttyq qundylyqtarymyzdy biriktiredi. Bul jolǵy aıtylǵan bastamalardyń el bolashaǵy úshin mańyzy óte zor. Óıtkeni, áleýmettik bastamalar kópultty halqymyzǵa kúsh-qýat berer qaınar kóz dep bilemin.​Elbasy​ aldaǵy ýaqytta kóptegen jumystardyń kútip turǵanyn aıtyp ótti. San-salaly ómirimizdiń barlyq tynys-tirshiligin túgel qamtyǵan Elbasy bastamalary kópbalaly otbasylar men jastardyń kóńiline úmit otyn uıalatyp otyr. Qazirgi kúni jastardyń kóbi páter jaldap, kún kóretini jasyryn emes. Qanshama jas otbasylar da baspananyń joqtyǵynan qınalyp júr. Osy rette jalǵa beriletin turǵyn úı qurylysynyń jandanatyny jas qazaqstandyqtardy bir serpiltip tastady», - dep túıindedi Nazım Shıhalıev.