Nazym Qyzaıbaıdyń ákesi: qyzyma qola medal buıyrdy

ALMATY. KAZINFORM — Otandasymyz Nazym Qyzaıbaıdyń jekpe-jegin ata-anasy, týystary men sportshylar mamandandyrylǵan joǵary sport sheberligi mektebinde tamashalady.

Bylǵary qolǵap sheberi Nazymnyń ákesi Abaı Qyzaıbaıdyń aıtýynsha, qytaılyq boksshy da osal emes. 

«Altyn alady dep oılap edik. Bolmady. Qytaılyq boksshy da osal emes. Osyǵanda shúkir. Qyzyma qola medal buıyrdy. Qyzym elge aman-esen oralsyn»,- dedi Nazymnyń ákesi Abaı Qyzaıbaı.

Anasy Kámshat Ahetqyzy Nazymnyń armany oryndalǵanyn jetkizdi.

«Nazymnyń armany- Olımpıadaǵa barý edi. Sol maqsatyna jetti.Júldeger atanyp jatyr, qýanyshtymyz. Qolaǵa qol jetkizdi. Bul da úlken eńbek. Úlken sport dodasynda el namysyn baryn salyp qorǵady»,- deıdi Nazymnyń anasy.

50 keli salmaqta otandasymyz jartylaı fınalda qytaılyq Vý ıÝmen qolǵap túıistirip, tóreshiler sheshimimen utyldy. Alaıda, Olımpıada oıyndarynyń qola júldesin qanjyǵasyna baılady. Nazymnyń bul júldesi - el qorjynyna túsken úshinshi qola medal. 

Bul – Nazym Qyzaıbaıdyń alǵashqy Olımpıadasy. Ol osyǵan deıin álem chempıonatynda 2 ret top jaryp, 1 ret úzdik úshtikti túıindegen. Sondaı-aq Azııa chempıony atanǵan.

Nazym Qyzaıbaı Olımpıada oıyndarynda eń alǵash ótkizgen jekpe-jeginde Italııa boksshysy Djordana Sorrentınony jarys jolynan taıdyrdy. 

Al ekinshi jekpe-jeginde brazılııalyq qarsylasy Karolın Barboza de Almeıdany 5:0 esebimen utyp, shırek fınalǵa shyqqan bolatyn. 

Sonymen qatar shırek fınalda Kolýmbııa boksshysy Karolaın Barbozany jarys jolynan shyǵaryp, jartylaı fınalǵa jetti.