Nazym Qyzaıbaı «Myqtylar» týrnırine qatyspaıdy – Bas bapker

ASTANA. KAZINFORM – Erteń áıelder boksynan Qaraǵandyda «Myqtylar týrnıri» bastalady. Osyǵan oraı, áıelder boksynan Ulttyq quramanyń bas bapkeri Eldos Saıdalınge habarlasyp, jarysqa kimder qatysatynyn, bul týrnırdiń mańyzy týraly surap bilgen edik.

— Eldos Jánibekuly, erteń Qaraǵandy tórinde burymdy boksshylar «Myqtylar týrnıri» bastalǵaly jatqanyn bilemiz. Bir aptaǵa sozylatyn bul týrnırdiń mańyzyna toqtalyp ótseńiz?

— Bul jarys aty atap turǵandaı naǵyz myqtylar anyqtalatyn týrnır. Parıj Olımpıadasynan keıingi birinshi iri respýblıkalyq jarys bolǵandyqtan barlyq óńirdiń boksshylary keledi. Osy týrnırde kim ózin dáledeıdi, sol boksshy qarasha aıynda Iordanııada ótetin Azııa chempıonatyna barýy múmkin. Sondyqtan, bul jarysty Azııa chempıonatyna irikteý desek te bolady.

— Boksshylar tek, olımpıadalyq salmaq sanatynda ǵana synǵa túse me?

— Joq, barlyq salmaq sanatynda, naqtyraq aıtsam 12 salmaq dárejesinde ózara myqtylar anyqtalady.

— Atalǵan týrnırde qyzdarymyz tuńǵysh ret sharshy alańǵa shilemsiz shyǵady degendi estip jatyrmyz. Bul názik jandy sportshylarǵa tym aýyr tımeı me?

— Iá, birinshi ret qyzdarymyz bas kıimsiz rıngke shyǵady. Bul jańa ereje. Endi aldaǵy halyqaralyq dodalardyń barlyǵynda qyzdarymyz jigitter sııaqty bas kıimsiz sharshy alańǵa shyǵatyn bolady. Aldaǵy Azııa chempıonaty jańa ereje boıynsha ótedi dep josparlanyp otyr.

— Bul jarysta Parıj Olımpıadasynyń júldegeri Nazym Qyzaıbaı qatysa ma?

— Joq, Nazym Qyzaıbaı bul týrnırge qatyspaıdy. Ol bizge, Ulttyq quramamen birge jattyǵýǵa tek, 6 qazan kúni qosylady. Parıjden kelgennen keıin qysqa merzimge demalys alǵan.

— Parıj Olımpıadasynan keıin quramada qandaı ózgerister bolyp jatyr?

— Búginge deıin ár boksshy óz aımaqtarynda daıyndaldy. Endi, osy «myqtylar týrnıri» aıaqtalǵannan keıin, ár boksshynyń kórsetken nátıjesine qarap, taldaý jasap baryp ózgeristerdi aıtatyn bolamyz.

— Áńgimeńizge rahmet!