Nazym Qyzaıbaı Brazılııada jańa salmaq dárejesinde óner kórsetedi
ASTANA. KAZINFORM — Qazaqstan áıelder boks quramasynyń bas bapkeri Eldos Saıdalın ulttyq quramanyń kapıtany Nazym Qyzaıbaıdyń Brazılııanyń Fos-de-Igýasý qalasynda ótetin World Boxing Álem kýbogynda 54 kelige deıingi salmaq dárejesinde óner kórsetetinin málimdedi, dep habarlady Sports.kz.
– Brazılııada ótetin jarysta Nazym 54 kelige deıingi salmaq dárejesinde judyryqtasady. Alda birneshe jekpe-jek ótkizýimiz kerek. Azııa oıyndarynyń aldynda barlyǵyn saralap, tekseremiz. Onyń qalaı bokstasatynyn kórip, sodan keıin túpkilikti sheshim qabyldaımyz, – dedi bas bapker.
Nazym Qyzaıbaı óziniń negizgi ataqtarynyń barlyǵyn 48 kelige deıingi salmaq dárejesinde jeńip alǵan. Onyń enshisinde álem chempıonatynyń úsh altyn medali, sondaı-aq 2025 jyly Lıverpýlde ótken World Boxing álem chempıonatyndaǵy kúmis júlde bar.
Al 2024 jyly Parıj Olımpıadasynda ol 50 kelige deıingi salmaq dárejesinde qola medal jeńip alǵan.
Qazirgi tańda Qazaqstannyń eń ataqty boksshy qyzdarynyń biri ulttyq quramamen birge Brazılııada oqý-jattyǵý jıynynda júr.
World Boxing Álem kýbogy da osy aıdyń sońynda dál sol jerde ótedi.
Aıta keteıik, Nazym Qyzaıbaı referendýmda azamattyq ustanymyn bildirip, daýys bergenin jazdyq.
