Nazym Qyzaıbaı bokstan álem kýbogynda jarysty aıaqtady
ASTANA. KAZINFORM — World Boxing federatsııasynyń uıymdastyrýymen ótip jatqan álem kýbogynda búgin, 22 sáýirde el quramasynan Nazym Qyzaıbaı (54 keli) jarys jolyn aıaqtady.
Bedeldi báseke Brazılııanyń Fos-dý-Igýasý qalasynda 20-26 sáýir aralyǵynda ótkiziledi.
Otandasymyz sharshy alańda polshalyq Vıktorııa Rogalınskamen qolǵap túıistirgen edi. Qos boksshy jekpe-jek boıy qashyqtyqta judyryqtasyp, bir-biriniń qımylyn ańdýmen boldy.
Teńdeı ótken aıqastyń taǵdyry sheshýshi úshinshi raýndta sheshilip, 4:1 esebimen Vıktorııa Rogalınskı jeńiske jetti.
Endi el quramasynan kúndizgi sessııada Farýh Toqtasynov (70 keli) japonııalyq Sevon Okazavamen sharshy alańǵa shyǵady.
Al keshki sessııada Vıktorııa Grafeeva (60 keli) ázerbaıjandyq Emılı Rzaeva, Natalıa Bogdanova (70 keli) túrkııalyq Býsenaz Sıýrmenelı, Danıal Sábıt (50 keli) majarastandyq Ishtvan Shzaka, Dıas Moljigitov (80 keli) aýstralııalyq Marlon Sevehonmen kezdesedi.
Aıta ketsek, budan buryn alǵashqy jekpe-jeginde Nazym Qyzaıbaı (54 keli), Muhammedsabyr Bazarbaıuly (65 keli), Farýh Toqtasynov (70 keli). Dıas Moljigitov (80 keli) jeńiske jetken edi.
El quramasynan Baǵlan Kenjebek (55 keli), Janseri Kósherbaev (60 keli), Dáýlet Tólemisov (90 keli) bul básekeni erte aıaqtaýǵa májbúr boldy.
Sondaı-aq álem kýbogynda olardan basqa erler quramasynan Sanjaráli Begalıev (75 keli), Sultan Aıbaruly (85 keli) sharshy alańǵa shyǵady.
Al áıelder quramasynda Alýa Balqybekova (55 keli), Aıda Ábikeeva (65 keli), Jibek Jarasqyzy (80 keli), Valerııa Aksenova (80 keliden joǵary) bar.
Kúndizgi sessııa Qazaqstan ýaqytymen 19:00 -de jáne keshki sessııa 1:00–de bastalady.
