Nazgúl Qojabek: Jasandy ıntellektiniń tilin túzetý — mamandarǵa júktelgen mindet
ASTANA. KAZINFORM — Jastar men oqýshylar jasandy ıntellekt quraldaryn sabaqtan bastap kúndelikti keńes alýǵa deıin paıdalanyp júr. Sondyqtan olardyń JI-den alatyn jaýabynyń tili qanshalyqty durys bolatynyna mamandar da jaýapty.
Bul týraly fılolog, aýdarmashy, redaktor, «Kalkasyz qazaq tili» jobasynyń avtory Nazgúl Qojabek Halyqaralyq aýdarmashylar kúnine arnalǵan jıynda aıtty.
Mamannyń aıtýynsha, qazirgi jasandy ıntellekt zamanynda kalka tek taralyp qana qoımaı, qaıta-qaıta óndirilip, kóbeıe beredi.
— Qazirgi jasandy ıntellekt zamanynda kalka ózinen-ózi týa beredi, kalka ózin-ózi kóbeıte beredi. Oǵan qarsy tura alatyn jalǵyz tosqaýyl — bizdiń bilimimiz, bizdiń tájirıbemiz, — dedi Nazgúl Qojabek.
Ol kalkany tilge tıgen dertke teńedi. Sondyqtan jasandy ıntellekt modelderine mátin qosatyn, olardy kásibı maqsatta paıdalanatyn mamandar tildik qatelerdi túzetýge atsalysýy qajet dep sanaıdy.
— Jasandy ıntellekt modelderiniń tilin túzep otyrýǵa tyrysýymyz kerek. Ol qazir bizdiń bárimizdiń moınymyzǵa zamannyń ózi júktep otyrǵan mindet bolyp tur. Zamannyń, tehnologııanyń, kóptiń jeteginde ketpeı, biz maman retinde jasandy ıntellektiniń jadyndaǵy tildiń tazalyǵy jolynda kúresýge májbúr bolyp turmyz, — dedi ol.
Nazgúl Qojabek bul máselege jastardyń jasandy ıntellektini belsendi qoldanýy turǵysynan da nazar aýdardy. Onyń aıtýynsha, qazir jastar JI-ge tek oqý úshin emes, kúndelikti ómirdegi túrli suraqtaryna jaýap alý úshin de júginedi.
— Olar kádimgi jasandy ıntellektiden bárin suraıdy: sabaǵyn da suraıdy, aqylyn da suraıdy, keńesin de suraıdy, tipti «mamam uryspaý úshin ne isteý kerek?» degen nárselerge deıin suraıtyn boldy. Bir suraqtyń jaýabyn júz kitap oqyp izdeý qıyn qazir, izdegisi kelmeıdi. Bárin osy jasandy ıntellektiden surasa, ol bir sátte jaýabyn taýyp beredi, — dedi maman.
Aıta keteıik, Astanada Halyqaralyq aýdarmashylar kúnine oraı «Qazirgi aýdarma: til, tehnologııa jáne jańa talaptar» taqyrybynda kásibı kezdesý ótti.
Halyqaralyq «Qazaq tili» qoǵamy uıymdastyrǵan basqosýda aýdarma salasyna jasandy ıntellekt pen jańa tehnologııalardyń yqpaly, qazaq tilindegi aýdarmanyń sapasy jáne mamandarǵa qoıylatyn jańa kásibı talaptar talqylandy.
Eske sala keteıik, buǵan deıin «Kalkasyz qazaq tili» jobasynyń avtory jasandy ıntellekt keńinen qoldanylǵan saıyn qazaq tilindegi kalkanyń kóbeıý qaýpi de artqanyn atap ótken edi.
