Nazerke Qystaýbaeva: Otan qorǵaý jolyndaǵy qyzmet bárinen de qymbat
QYZYLORDA. QazAqparat - Áskerı salada jemisti eńbek etip júrgen názik jandylar az emes. Solardyń biri - Qyzylorda garnızony áskerı bóliminiń baılanys vzvodynyń aǵa mamany, aǵa telefonısi Nazerke Qystaýbaeva, dep habarlaıdy QazAqparat tilshisi.
Qyzylorda garnızony áskerı bólimi baılanys vzvodynyń aǵa mamany, aǵa telefonısi Nazerke Qystaýbaeva áskerı salada 6 jyldan astam ýaqyt qyzmet etip keledi.
Ol «Ońtústik» óńirlik qolbasshylyǵy áskerleri arasynda ótken ofıtserlik úshsaıysta atýdan kózdegen nysanadan múlt ketpeı, birinshi oryn aldy. Áskerı qyzmetshilerdiń kúndelikti tártibi men kıgen kıimine qyzyqqan arýdyń bul salany tańdaýyna ákesi men aǵasy sebepshi bolǵan.
«Qyzyǵy men shyjyǵy qatar júretin salanyń biri - áskerı sala. Osy salanyń qyzmetkeri bolǵanyma qýanyshtymyn. Qıyndyǵy jaǵynan ózge salalarmen salystyrýǵa kelmeıtini belgili. Basynda qıyndyqtar týyndaǵanyn jasyra almaımyn. Jumysqa erte ketip, kesh oralatyn, jaýyngerlik daıyndyq kezinde de qıyndaý bolǵan sátter boldy. Alaıda Otan qorǵaý jolyndaǵy qyzmet bárinen de qymbat ekenin túsindim», - deıdi Nazerke Qystaýbaeva.
Áskerı qyzmettiń salmaǵy aýyr. Qyzmet ótkerý kezinde kerzi etikpen, oqý-jattyǵý dabyly kezinde brondy keýdeshe kıip júrýge týra keledi. Qarý asynyp, aýyr radıostantsııamen áskerı qyzmetkerdiń jeke zattaryna arnalǵan dorbany qosa arqalaıtyn ýaqyttar da bolatynyn aıtty. Sondaı-aq, jaýynger arý tań atqannan kesh batqanǵa deıin 25-30 kelini ıyqqa asyp júrgenin de jetkizdi.
«Barlyq isti jigermen, shyn nıetpen atqarǵan kezde qıyndyqtardy artta qaldyrýǵa bolatynyn bildim. Osy áskerı bólimde erlermen qatar ıyq tirese jumys istep júrgenimdi maqtan tutamyn. Ár istiń óz qıyndyǵy bar. Áskerde erlermen qatar Otan qorǵaýǵa atsalysyp júrgen búkil arýlardy merekemen quttyqtaımyn», - deıdi Nazerke Qystaýbaeva.
