Nazerke Kúzesova: Bıznesti júrgizý - úlken jaýapkershilik

ASTANA. QazAqparat - «Raıymbek» sharýa qojalyǵynyń basshysy, model, «Nur Otan» partııasy men «Jas Otan» jastar qanatynyń múshesi Nazerke Kúzesova «Jas Otannyń» IV sezine qatysyp jatyr. Ol agrarlyq salaǵa qalaı kelgeni týraly «QazAqparat» HAA tilshisine bergen suhbatynda aıtty. 

Nazerkeniń aıtýynsha, ol bul salaǵa kezdeısoq kelmegen, sebebi sharýa qojalyǵy - otbasylyq bıznes.
«Biz qajyrly eńbek pen aýyzbirshiliktiń arqasynda tabysqa qol jetkizdik. Búginde biz BAÁ jáne Iran elderindegi kompanııalarmen et jetkizý máseleleri boıynsha tikeleı kelissózder júrgizip jatyrmyz. Bizde et ónimderin sertıfıkattaý júıesinde birqatar máseleler bar. Biraq, biz qoryqpaımyz, bizdiń bolashaǵymyz alda. Budan bólek, eksporttaýshylarǵa Aýyl sharýashylyǵy mınıstrligi men «Atamekenniń» óńirlik basqarmasy kómektesip jatyr», - dedi N.Kúzesova.
Nazerke sheteldik aýylsharýashylyq naryǵyn ıgerý úshin halyqaralyq quqyqty úırenip jatyr. Budan bólek, sharýa qojalyǵynyń basshysy fotomodel retinde de tanymal.
«Tek básekelestik qana damý úshin jaǵdaı jasaıdy, jaqsy ónim beredi. Bul bizdiń tutynýshylarymyz úshin de mańyzdy», - dep túıindedi ol.