Nazerke Áriptiń týystary qylmyskerdi ómir boıy bas bostandyǵynan aıyrýdy surady
ALMATY. QazAqparat - Nazerke Áriptiń týǵan tátesi Jazıra Sybanbaeva boıjetkendi óltirgen qylmyskerdi ómir boıy bas bostandyǵynan aıyrýdy surap Feısbýkte jazba qaldyrdy, dep habarlaıdy QazAqparat tilshisi.
«Men Nazerke Áriptiń tátesimin. Sol kúni Nazerke úıinen shyǵyp, taksı ustaǵan. Rólde Qurban Ysqaqov bolǵan. Ony ustaý úshin kóp ýaqyt ketti. Qazaqstannyń ár buryshynan týysqandary kelip izdestirdi. Q.Ysqaqov áýel bastan tergeýden kúdikti boldy. Ol buryn adam óltirgeni úshin 3 ret sottalǵan, biraq merziminen buryn bosap shyqqan», - dedi Jazıra Sybanbaeva.
Onyń aıtýynsha, Ysqaqov Nazerkeni óltirip, Keńsaı zıratynda qaldyryp ketken.
«2 aı boıy Nazerkeniń múrdesi shyjyǵan kún astynda jatty. Sot kezinde Qurban Ysqaqov úsh aıyptyń bireýin ǵana óltirgenin ǵana moıyndady. Onyń ishinde ony zorlaǵanyn, qasaqana óltirý qylmystyq oı pıǵyly bolǵanyn moıyndamady. Bizdiń sottyń, zańnyń ádildigine senemiz. Ol burynǵydaı adam óltirgeni úshin otyryp shyǵyp, tártipti qylyǵy úshin qaıta shyqqysy kelip tur ǵoı. Týra osylaı boldy ǵoı. Qyzdyń ómirin úzdi. Endi kimniń kóz jasyna qalǵysy kelip júr?», - dedi kelinshek.
Qazir isti qylmystyq ister boıynsha aýdanaralyq mamandandyrylǵan soty qarap jatyr. Sot jabyq rejimde ótýde.
«Men ol adamnyń ómir boıy túrmede otyrǵanyn qalaımyn. Sebebi, buryn da azamattyq nekedegi áıelin 18 jerinen pyshaqtap óltirgen, birneshe ret zorlyq jasaǵan. Sol úshin 11 jylǵa kesilip, onyń 9 jylyn otyryp shyqqan. Sonda osyndaı qanisher adamdy qalaısha bosatýǵa bolady? Men ony ómir boıy túrmede otyrýyna qol jetkizýge tyrysamyn. Ol taǵy 10 jylda shyǵatyn bolsa, onda basqa qyzdardyń obalyna qalady», - dedi marqum Nazerkeniń anasy, japa shegýshi Sáýle Sarbaeva.
Onyń aıtýynsha, sottalýshynyń anasy Nazerkeniń ata-anasyna baryp balasynyń esi durys emestigin alǵa tartyp aqtap alýǵa tyrysqan. Alaıda, sot saraptamalarynyń nátıjesinde kúdiktiniń aqyl-esi durys ekeni dáleldendi.
Almaty qalasy men Talǵar arasynda kóligimen jolaýshy tasýmen aınalysatyn kúdikti óz kinásin moıyndaǵan.
Іs materıaldaryna sáıkes, kúdikti Nazerkeni sol kúni qalaǵa jetkizip salmaq bolǵan. Jarty jolda boıjetkendi zorlap, býyndyryp óltirip Keńsaı zıraty jaqqa aparyp tastaǵan. Aıta ketý kerek, 10 shilde kúni 18 jastaǵy Nazerke Árip Tuzdybastaý aýylyndaǵy úıinen shyǵyp sol bette oralmaǵan . Keıin 6 qyrkúıekte Nazerkege uqsaıtyn qyzdyń denesi Keńsaı zıratynan tabyldy.
