Nazarda - azyq-túlik qaýipsizdigi - respýblıkalyq basylymdarǵa sholý
ASTANA. Qyrkúıektiń 28-i. QazAqparat - Qazaq aqparat agenttigi respýblıkalyq basylymdarda qyrkúıektiń 28-i, seısenbi kúni shyqqan ózekti materıaldarǵa sholýdy usynady.
***
«Tájikstan Eýropadaǵy qaýipsizdik jáne yntymaqtastyq uıymynyń jaýapkershilik aýmaǵyna kiretini belgili. Sondyqtan bıylǵy jeltoqsannyń basynda Astanada ótetin EQYU-nyń Sammıtinde Tájikstan máselesiniń de qaralatyny týraly burynnan da aıtylyp júr edi. Sońǵy kezderi sol uıǵarymnyń beker emes ekenin bildiretin oqys oqıǵalar bul elde tym kóbeıip ketti. Al taıaýda túrmeden
qashqan topty izdeýge shyqqan áskerılerdi belgisiz bireýlerdiń Garm shatqalynda kútpegen jerden atqylap, 40 jaýyngerdi opat etýi Tájikstandaǵy ishki shıelenistiń belgili bir deńgeıge deıin ýshyǵyp ketkenin ańǵartty», dep jazady «Egemen Qazaqstan» basylymy búgingi shyqqan sanynda. Bul týraly basylymda jarııalanǵan «Tájiktiń taýlaryna tuman tústi» atty maqaladan oqısyzdar.
Sondaı-aq osy basylymnyń úkimettiń keshegi selektorlyq májilisinde kóterilgen máselelerge súıene otyryp habarlaýynsha, Qazaqstannyń keıbir óńirlerinde tamyz aıynan bastap qaraqumyq jarmasynyń bólshek saýdadaǵy baǵasy óskeni baıqalyp otyr. Jalpy respýblıka boıynsha ortasha alǵanda onyń baǵasy 48,5 paıyzǵa deıin kóterilgen. Basqosýda sonymen qatar Ekonomıkalyq damý jáne saýda mınıstri Janar Aıtjanova elimizde 2010 jyly ınflıatsııa deńgeıi aldyńǵy jyldyń jeltoqsanymen salystyrǵanda 4,6 paıyzdy quraǵandyǵyn, bul ótken jyldyń osy merzimimen salystyrǵanda 0,3 paıyzdyq pýnktke joǵary ekendigin aıtty. Bul másele «Egemen Qazaqstan» basylymyndaǵy «Nazarda - azyq-túlik qaýipsizdigi» atty maqalada aıtylǵan.
***
«Aıqyn» basylymynyń habarlaýynsha, qazaqstandyq naryqtaǵy básekelestikti qyzǵyshtaı qorǵaýǵa jáne monopolısterdiń bassyzdyǵyn boldyrmaýǵa jaýapty qos organ keshe ózderi atqarǵan jumystary jóninde esep berdi. Básekelestikti qorǵaý agenttigi elimizdiń ońtústigindegi nannyń qymbattaýyna qatysty shildedegi janjaldy tutanqandardy taýyp alypty. Alaıda olar ózderiniń kináli emestigin aıtyp azar da bezer bolýda. Sondyqtan olardyń
isi sotqa berildi. Al Aldabergenovtyń mekemesi alpaýyttarmen jaǵalasyp júrip, birneshe jekepe-jekte jeńiske jetken. Tabıǵı monopolııalardy retteý agenttigi jyl basynan beri jylý monopolısterinen mıllıardqa jýyq qarjy óndirip alǵan. Bul másele týraly «Aıqyn» basylymynyń búgingi sanyndaǵy «Sotqa tartyp jatyr» atty maqalada keńinen baıandalady.
Sondaı-aq osy basylymnyń jazýynsha, Qazaqstanda asyl tuqymdy múıizdi iri qara sharýashylyǵyn basym baǵyt retinde qarastyryp, ony jetkilikti mólsherde qarjylandyrý - ómirdiń ózi usynyp otyrǵan basty qajettilik. «Osy qajettilikti oryndaýǵa jedel kirispesek, utylysymyz kóp bolmaq. Al muny 2011 jyldan bastap, basym baǵyt retinde qabyldap, qarjylaı qoldap, eń kemi aldaǵy eki jylda aýyl sharýashylyǵynyń osy salasyna memlekettik mańyzdy is retinde janashyrlyq jasasaq, eki emes, úsh qoıandy bir oqpen atqan bolyp shyǵamyz», dep jazady basylym tilshileri. Bul týraly «Aıqynnyń» búgingi sanyndaǵy «Aqylbektiń aqyldy jobasy» atty maqalada.
***
«Alash aınasy» basylymynyń habarlaýynsha, memleketimiz eldegi zeınetkerlerge qaraǵanda, qylmystyq jazasyn óteýshige aqshany artyq bóledi eken. Tipti 30-40 jyl eńbek etken zeınetkerdiń ózine 18 myń 25 teńge beredi. «Statıtıka agentiginiń málimetterinshe, shilde aıynda Qazaqstandaǵy bir jumysshynyń ortasha aılyq ataýly jalaqysy 82 myń 280 teńge boldy. Zeınetaqy taǵaıyndaýda bálkim osy kórsetkishti negizge alyp, tym quryǵanda zeınetaqy mólsherin ortasha jalaqy mólsheriniń 50 paıyzyna jetkizý kerek shyǵar», dep jazady basylym tilshileri. Bul másele jóninde basylymnyń búgingi sanyndaǵy «Aılyq tabysyń 5 myń teńge bolsa, kedeı emessiń» atty maqaladan bilýge bolady.
Osy basylymnyń QazTAG agenttigine silteme jasaı otyryp habarlaýynsha, jaqynda ǵana qylmystyq is qozǵalan elimizdiń bas dárigeri Jaqsylyq Dosqalıev Astana qalasyndaǵy respýblıkalyq klınıkalyq aýrýhanada jatyr. Mınıstr aýrýhanaǵa jeksenbi kúni jetkizilgen. Alaıda aýrýhana qyzmetkerleri onyń qandaı dıagnozben túskendigin aıtpaǵan. Bul jaǵdaıǵa baılanysty aqparatty «Alash aınasynyń» búgingi sanyndaǵy «Qylmystyq is qozǵalǵan bas dáriger jan saqtaý bóiminde jatyr» atty aqparattan bilesizder.
***
«Kazahstanskaıa pravda» basylymy keshe Elbasy elimizdiń Úkimet basshysy Kárim Másimovty qabyldaǵanyn jazǵan. Onda eldiń áleýmettik-ekonomıkalyq hal-ahýaly jaıynda esep bergen Premer-Mınıstr elde astyq jınaý naýqanynyń aıaqtalǵanyn jetkizgen. Respýblıka boıynsha 13 mıllıon tonna astyq jınalǵan. Qalyptasqan jaǵdaı eldegi azyq-túlik qaýipsizdigin qamtamasyz etýge tolyq qaýqarly. Onyń ústine eldegi astyq qory da 2011 jyldyń qazan aıynyń 1-ne deıin jetedi. Bul týraly «Kazahstanskaıa pravda» basylymynyń búgini sanyndaǵy «Kazahstan s hlebom» atty maqalada.
***
«Lıter» basylymynyń jazýynsha, aldaǵy ýaqytta Qazaqstannyń aqparat keńistigi múmkindiginshe ashyq bola túsedi. «Nur Otan» partııasynyń ókilderi tusaýyn kesken «Qoǵamdyq aqparatqa qoljetimdilik» atty zań jobasynyń talaptary boıynsha endi eldiń árbir azamaty memlekettik organdardyń qyzmeti týraly aqparattardy emin-erkin ala alatyn bolady. Eń jaqsysy, bul aqparattardy alý úshin azamattar onyń ne úshin qajettigi jóninde eshkimge de esep bermeıdi. Atalmysh qujattyń basty maqsaty tek memlekettik organdardyń qyzmetin ashyq etip qana qoımaı, qalyń kópshiliktiń osy organdardyń qyzmetine baqylaýyn kúsheıtý bolyp tabylady. Bul týraly «Lıter» basylymynyń búgingi sanyndaǵy «Chto, gde, kogda» atty maqalada.
