Nazarbaev qory nege aqshany jylystatý monıtorınginen tys qaldy — agenttik jaýaby

ASTANA. KAZINFORM – Qarjylyq monıtorıng agenttigi tóraǵasynyń orynbasary Jeńis Elemesov Májilistiń jalpy otyrysynan keıin Nazarbaev qory nege aqshany jylystatý monıtorınginen tys qalǵanyn túsindirdi.

Májilis depýtattary birinshi oqylymda maquldaǵan zań jobasynda zańsyz aqshany jylystatý turǵysynan júrgiziletin monıtorıngke kiretin nysandar sanaty kórsetilgen. Ol tizimniń ishinde endaýment qorlar men Nazarbaev qory joq. Jýrnalıst Nazarbaev qory nege tizimge enbegenin suraǵan. 

— Qarjylyq monıtorıng sýbektisine alǵannan qandaı paıda bar. Birinshiden, mynany túsiný kerek. Nazarbaev qoryna qarjy qaıdan túsedi? Qarjy uıymdarynan túsedi. Qarjy uıymdary degenimiz — bankter, tólem uıymdary. Olardyń bári onsyz da Qarjylyq monıtorıng sýbektisine kiredi. Olarǵa qoıatyn krıterılerimiz bar. Qorǵa aqsha túsken bolsa, ol bank arqyly kelgen bolsa, qanshalyqty zańdy ekenin kórip otyramyz. Ol aýdarymda kúdik bolsa, bizge málimet túsedi. Ári qaraı taldaımyz, — dedi ol.

— Sizdiń jaýabyńyzdan Qarjylyq monıtorıng agenttigi Nazarbaev qoryn zańsyz aqshany jylystatýǵa beıim uıym retinde qarap otyrǵan joq degen qorytyndy shyǵara alamyz ba, — dep naqtylady jýrnalıst.

— Iá, — dep qysqa qaıyrdy ol.

Májilis depýtaty Baqytjan Bazarbek Astana Hub, «Qazaqstan halqyna» qoǵamdyq qory, «Jasyl damý» aktsıonerlik qoǵamy sııaqty mekemelerdiń qarjylyq monıtorıng aıasynan tys qalyp bara jatqanyna narazylyq bildirdi.