Nazarbayev University saıabaǵy barlyq qala turǵynyna qoljetimdi bolady
ASTANA. KAZINFORM – Nazarbayev University ujymy men stýdentteri «Taza Qazaqstan» ekologııalyq naýqanyna qatysyp, 140-tan astam jemis aǵashyn otyrǵyzdy.
Kóshetter arasynda manchjýr jańǵaǵy, sibir almasy, ýssýrı almurty jáne jabaıy shıe aǵashtary bar. Jabaıy shıe kóshetterin ýnıversıtetke «Turaqty damý» jer qory uıymy bergen.
«Bul jabaıy shıe sorty «Sakýra» dep atalady, bizdegi salqyn klımatqa tózimdi túri tańdap alyndy. Ol jemis berip úlgermeıdi, biraq óte kóp gúl ashady. Sakýra mol sýarý men sapaly kútimdi qajet etedi. Sakýra óziniń sulýlyǵymen, erte gúldeýimen kampýstyń maqtanyshyna aınalyp, kelýshiler men elorda turǵyndarynyń júregin jaýlaıdy dep senemiz. Bıyl kóshetter alǵash ret berildi. Kelesi jyly kelisimder bolsa, árıne bul ıgi isti jalǵastyrýǵa daıynbyz», - «Turaqty damý» jer qorynyń sarapshysy Mıras Qadyrbaev.
NU Prezıdentiniń keńesshisi Qanat Baıǵarınniń aıtýynsha, ózge jemis aǵashtary ýnıversıtet tálimbaǵynan alynǵan. Aǵash egýden bólek, ujym senbilik jasap, kampýs aýmaǵyn tazartyp shyqty.
«Bizdiń kampýstyń eleýli bóligin – shamamen 25 gektar aýmaqty jalpyǵa qoljetimdi qalalyq saıabaqqa aınaldyrý máselesin qarastyryp jatyrmyz. Muny qalalyq, aýdandyq ákimdiktermen talqylaımyz. Nátıjesinde Astananyń barlyq turǵyndary men kelýshileri bul saıabaqta demala alady. NU aýmaǵyna aǵash egý bastamasyna Qazaqstannyń basqa da ýnıversıtetterin shaqyrdyq», - dedi Qanat Baıǵarın agenttik tilshisine bergen suhbatynda.
Q.Baıǵarın NU stýdentteriniń jasyl jobalardy belsendi júrgizetinin atap ótti. Máselen, ýnıversıtet qyzmetinde qaǵazdy barynsha az qoldanyp, elektrondy jumysqa basymdyq beriledi.
«Qoqys suryptaýdy da alǵashqylardyń biri bolyp qolǵa alǵan edik. Qazir stýdentterimiz sýdy tazartý, aýany tazartý, qýat únemdeý, tipti ashanadaǵy maı qaldyqtaryn da qaıta óńdeý jobalaryn júzege asyrýda. Muny úlken jumys dep oılamaýyńyz múmkin. Alaıda stýdentterdiń praktıkalyq oılaýy qalyptasyp, turmystyq-áleýmettik máselelerdi sheshýge septigin tıgizedi. Óz jobalarymyzben qatar, Qazaqstandaǵy 12 ýnıversıtet stýdentteriniń jasyl jobalaryna qarjylaı qoldaý kórsetemiz. Tutas elimizdiń ekologııalyq máselelerin sheshý úshin National Conservation Initiative arnaıy qoryn qurdyq», - deıdi Q.Baıǵarın.
Aıta keteıik, elimizde Memleket basshysy Qasym-Jomart Toqaevtyń bastamasymen uıymdastyrylǵan «Taza Qazaqstan» respýblıkalyq ekologııalyq aktsııasy ótip jatyr. «Taza Qazaqstan» respýblıkalyq aktsııasy aıasynda senbilik ótkizý elimizdegi ekologııalyq mádenıetti qalyptastyrý máselelerinde yntymaqtasý men sý tasqyny sııaqty ekologııalyq apattardyń saldarymen kúreske nazar aýdarýdy kózdeıdi.
Buǵan deıin NU basshylyǵy men qyzmetkerleri sý tasqynynan zardap shekken azamattardy qoldaý týraly bastama kóterip, Qostanaı oblysyna qajetti zattardy jibergen edi. Qaıyrymdylyq naýqanyna stýdenttik uıymdar da qosylǵan.
