Nazarbayev University-de sheteldik stýdentter sany rekordtyq deńgeıge jetti
ASTANA. KAZINFORM — Jańa oqý jylynda Nazarbayev University (NU) tarıhyndaǵy eń kóp sheteldik stýdentti qabyldady. Osylaısha, ýnıversıtettiń halyqaralyq stýdenttik qaýymdastyǵy keńeıip, búginde NU-da álemniń 40 elinen kelgen jastar bilim alyp jatyr.
Olardyń qatarynda AQSh, Germanııa, Japonııa, Qytaı, Vetnam, Reseı, Ózbekstan jáne Qyrǵyzstan azamattary bar.
Jańa oqý jyly bastalar aldynda sheteldik stýdentterge arnalǵan beıimdelý jáne ıntegratsııa máselelerine baǵyttalǵan aqparattyq sessııa ótti. Kezdesý barysynda stýdentterge oqý kezinde qoljetimdi qoldaý sharalary men qajetti resýrstar tanystyryldy.
NU-dyń stýdenttik ister jáne halyqaralyq qatynastar jónindegi vıtse-prezıdenti Qadısha Daıyrova stýdentterge arnaǵan sózinde ýnıversıtettiń qurylý tarıhy men onyń Qazaqstanda jáne álemniń ár túkpirinde eńbek etip júrgen túlekteri týraly aıtyp berdi.
— Bizdiń túlekterimiz kásibı joldaryn ártúrli baǵytta qalyptastyrdy. Olar halyqaralyq uıymdarda jumys isteıdi, óz kompanııalary men startaptaryn qurady, al kópshiligi álemniń jetekshi ýnıversıtetterinde bilimin jalǵastyryp jatyr. Ýnıversıtette oqýdyń alǵashqy jyldarynan bastap sizderdi onyń ómirine belsendi aralasýǵa, taǵylymdamadan ótý jáne kásibı damý múmkindikterin izdeýge shaqyramyn. Dál osy tájirıbe óz kásibı joldaryńyzdy qalyptastyrýǵa kómektesedi, — dedi Qadısha Daıyrova.
Stýdentterdi NU vıtse-prezıdenti Ásel Ývalıeva da quttyqtady. Onyń aıtýynsha, ýnıversıtetke qabyldanǵan sátten bastap sheteldik stýdentter NU tarıhynyń bir bóligine aınalyp, onyń damýyna óz úlesin qosa alady.
— Osy sátten bastap sizder jaı ǵana NU stýdentteri emessizder. Sizder bizdiń tarıhymyzdyń bir bóligine aınalasyzdar. Otandaryńyzdaǵy dostaryńyzben jáne jaqyndaryńyzben bolǵan ár áńgime, bólisken ár sýret, ár tájirıbe men áserińiz álemniń ártúrli elderinde Qazaqstan men ýnıversıtet týraly túsiniktiń qalyptasýyna yqpal etedi, — dedi Ásel Ývalıeva.
Eske salaıyq, buǵan deıin Ǵylym jáne joǵary bilim mınıstri Saıasat Nurbek magıstratýranyń konkýrstyq irikteý qorytyndysy 24 tamyz kúni jarııalanatynyn habarlaǵan edi.
