Nazarbaevqa til tıgizgeni úshin jazaǵa tartatyn norma kodeksten qashan joıylady

ASTANA. QazAqparat – Májilis depýtaty Snejana Imasheva Qylmystyq kodeksten Nursultan Nazarbaevqa til tıgizgeni úshin jazaǵa tartatyn 373 jáne 374-bapty alyp tastaýǵa qatysty pikir bildirdi, dep habarlaıdy QazAqparat tilshisi.

«Mundaı túzetýler qarastyrylǵan. Aktıvterdi qaıtarý týraly zań jobasy aıasyndaǵy ilespe qujatta jaýapkershilikti alyp tastaıtyn norma bar. Bul qadamdar Konstıtýtsııada qabyldanǵan túzetý aıasynda eskerilgen. Konstıtýtsııada Elbasy jáne onyń ókilettikteri týraly kórsetilmegen, sondyqtan bul baptar Qylmystyq kodekste qajet emes. Óıtkeni, Elbasy degen mártebe qarastyrylmaǵan jáne qylmystyq jaýapkershilik endi bolmaıdy ári qoldanylmaıdy», - dedi S. Imasheva Májiliste tilshilerdiń suraǵyna jaýap bere otyryp.

Sonymen qatar ol atalǵan norma zańnamada qashan joıylatynyn aıtty.

«Aktıvterdi qaıtarýǵa qatysty zań jobalarynyń barlyq paketin qabyldaǵan kezde, bul normalar da alynyp tastalady. Osy normalardy Májilistegi bizdiń komıtet qarastyryp jatyr. Til tıgizgeni úshin qarastyrylǵan jaýapkershilik normasy joıylady», - dedi depýtat.

Jaqynda Parlament Májilisi zańsyz shyǵarylǵan aktıvterdi memleketke qaıtarý týraly zań jobasy men birneshe ilespe qujatty talqylaıdy.

Budan buryn habarlanǵandaı, Qylmystyq kodeksten Nursultan Nazarbaevqa til tıgizgeni úshin jazaǵa tartatyn 373 jáne 374-baptar alynyp tastalady.