Nazarbaeva júıe quraýshy kásiporyndar jaıly: Osy tizimde maska shyǵaratyn kásiporyn bar ma
NUR-SULTAN. QazAqparat – Densaýlyq saqtaý júıesi týraly jańa kodekstiń jobasymen jumys barysynda senatorlar osy salanyń tótenshe jaǵdaı kezindegi problemalyq máselelerin eskergeni durys. Bul týraly Parlament Senatynyń tóraǵasy Darıǵa Nazarbaeva málim etti, dep habarlaıdy QazAqparat tilshisi.
«Qasym-Jomart Kemeluly óz Málimdemesinde medıtsınany damytýǵa erekshe kóńil bóldi. Bul sala aýqymdy memlekettik qoldaýǵa ıe bolady. Prezıdent halyqtyń densaýlyǵyn qorǵaý júıesin jaqsartý jónindegi naqty usynystardy qarastyra otyryp, halyq densaýlyǵy men densaýlyq saqtaý júıesi týraly jańa Kodeks qabyldaýdy tapsyrdy. Osy asa mańyzdy qujatpen biz, qurmetti áriptester, jaqyn arada jumysty bastaımyz.
Halyq densaýlyǵy jáne densaýlyq saqtaý júıesi týraly jańa Kodekstiń jobasymen jumys isteý kezinde senatorlar osy salanyń tótenshe jaǵdaı kezindegi problemalyq máselelerin eskergeni durys dep sanaımyn», - dedi D. Nazarbaeva Senattyń jalpy otyrysynda.
Sonymen qatar ol pandemııa qoǵamnyń artyqshylyqtary men damý qundylyqtaryn túbegeıli ózgertkenin atap ótti.
«Azamattardyń ómiri men densaýlyǵyn saqtaý árqashan memlekettik saıasattyń negizgi máselesi bolyp kelgen, biraq bul mindet qazirgideı ótkir bolǵan emes. Osydan kelip barsha qoǵam elimizdegi medıtsınany damytý strategııasyna aıryqsha nazar aýdaryp otyr. Biz elimizdiń júıe qalyptastyrýshy kásiporyndar tiziminiń jobasyn kórdik. Onyń qurylý prıntsıpterine qatysty depýtattar óz pikirlerin ashyq aıtty. Biraq mynadaı suraq týyndaıdy – osy tizimde medıtsınalyq maska nemese dezınfektsııa quraldaryn shyǵaratyn tym bolmaǵanda bir kásiporyn bar ma? Al Prezıdenttiń tapsyrmasy boıynsha otandyq test-júıelerin, ımmýndy bıologııalyq preparattardy óndiretin, koronovırýs ınfektsııasyna qarsy vaktsına shyǵarýǵa daıyn kásiporyndar qaıda?
Munaı men paıdaly qazbalardan tabys azaıǵan jaǵdaıda, biz rasynda da budan ári osy ómirlik mańyzy bar taýarlardy valıýtamen ımporttaýdy jalǵastyrmaqpyz ba? Búgin bul tipten rıtorıkalyq suraqtar emes. Qazirgi kezde bizge memlekettik saıasat basymdyqtary týraly burynǵydan da salmaqty áńgime qajet, atqarýshy bıliktiń problemalary men josparlary jarııa jáne ashyq túrde talqylanýy kerek», - dedi Darıǵa Nazarbaeva.
