Nazarbaev zııatkerlik mektepteriniń «Tilge boılaý» ádistemesi búkil bilim oshaqtaryna taratylýy múmkin

ASTANA. KAZINFORM – Qazaqstan mektepterinde Nazarbaev mektepteriniń erekshe ádistemesi engizilýi múmkin. Halyqaralyq «Qazaq tili» qoǵamynyń prezıdenti Raýan Kenjehanuly Kazinform agenttigine bergen suhbatynda osyndaı málimet aıtty.

- Biz osy jumysqa kiriserdiń aldynda Oqý-aǵartý mınıstrliginiń mamandarymen uzaq aqyldasyp, mınıstrmen birge jeke memorandýmǵa qol qoıǵanbyz. Sol memorandýmda siz surap otyrǵan másele aıtylǵan. Bir jyldyń ishinde onnan astam oblysta qazaq tili jáne ádebıeti pánderiniń forýmyn ótkizdik. Aımaqtardaǵy 6 myńdaı til jáne ádebıet muǵalimine osy forýmdar aıasynda «Tilge boılaý» ádistemesin tanystyrdyq, nátıjesin kórsettik. Bul ádistemeni iske asyrǵysy kelgen balabaqsha nemese mekteptiń alǵashqy qadamdy neden bastaý keregin túsindirdik, - deıdi ol.

Atalǵan ádisteme orys tildi balabaqshalar men mektepterdiń til oqytý ádistemesine negizdelgen. Ony zııatkerlik mekteptiń mamandary qazaq tiline halyqaralyq tájirıbeni eskere otyryp beıimdegen. Mundaı júıede balanyń aınalasy túgel qazaqsha sóıleýi kerek.

- Sheshim qabyldaıtyn basqarmalarǵa da usynystarymyzdy jiberdik. Bul ádistemeni Qazaqstanǵa ákelip, beıimdep, iske asyrǵan – Nazarbaev zııatkerlik mektepteri. Bizdiń bilýimizshe, mınıstrlik NZM-men birge osy júıeni elge taratý jaǵyn bólek pysyqtap jatyr, - dedi qoǵamnyń prezıdenti.

Suhbattyq tolyq nusqasyn myna siltemeden oqýǵa bolady.