Nazarbaev Zııatkerlik mektepterine bólinetin qarajat azaıdy - Ǵanı Beısembaev
ASTANA. KAZINFORM — QR Oqý-aǵartý mınıstri Ǵanı Beısembaev Nazarbaev Zııatkerlik mektepteriniń ońtaıly tájirıbesi basqa mektepterge durys baǵyt beretinin aıtty.
«Byltyrdan beri osy mektepterge bólinetin qarjy 20 mlrd teńgege qysqardy. Sondyqtan bul baǵytta jumystar atqarylyp otyr, barlyq másele qarastyrylyp jatyr. Jalpy, osy mektepterdiń tájirıbesin jáne osy ońtaıly tájirıbeniń el aýmaǵyndaǵy mektepterge taratylýyn joqqa shyǵarýǵa bolmaıdy. Bul mektepter (Nazarbaev Zııatkerlik mektepteri) óz deńgeıinde brendke aınaldy. Máselen, sheteldik mamandar osy mektepterdiń tájirıbesin zerdelep jatqanyn atap ótken jón», - dedi Ǵ. Beısembaev Májilistiń jalpy otyrysynan keıin tilshiler suraǵyna jaýap bere otyryp.
Bul turǵyda mınıstr Nazarbaev Zııatkerlik mektepteri jaqsy deńgeıde damyǵanyn, sondyqtan onyń tájirıbesi basqa da mektepterge durys baǵyt beretinin atap ótti.
Atap aıtqanda búgin Májilistiń jalpy otyrysynda Magerram Magerramov Nazarbaev Zııatkerlik mektepteri men Nazarbaev Ýnıversıtetine nelikten qomaqty qarajat bólinip jatqanyn suraǵan bolatyn.
Osyǵan deıin Májilis tóraǵasy Erlan Qoshanov Ulttyq qor qarajatyn paıdalaný praktıkasyn doǵarý qajettigin aıtty.
