NIS-tiń oqýshyǵa qatysty sheshimine qurmetpen qaraý kerek – Aımaǵambetov

ASTANA. KAZINFORM – Nazarbaev Zııatkerlik mektebiniń (NIS) óz oqýshysyna qatysty qabyldaǵan sheshimine baǵynýymyz kerek. Májilis depýtaty Ashat Aımaǵambetov osyndaı pikir bildirdi. 

— Bul máselege qatysty baǵa bere almaımyn. Jalpy, osy sheshimge de baǵa berip jatqan joqpyn. Mektep deńgeıindegi jáne oqý ornynyń quzyretindegi másele bolǵannan keıin, oǵan qatysty eshqandaı pikirimdi bildirmedim. Atap aıtqanda, mektep sheshim qabyldady jáne osy sheshimge qurmetpen qaraımyn. Osy sheshim aıasynda ary qaraı jumys jalǵasady dep sanaımyn, — dedi Ashat Aımaǵambetov Parlament Májilisiniń jalpy otyrysynan keıin tilshiler suraǵyna jaýap bere otyryp.

Onyń aıtýynsha, atalǵan oqıǵada muǵalim mártebesine nuqsan keldi.

— Eger ár balanyń tártip buzý áreketine kóz juma qarasaq, onda ne bolady? Sondyqtan mektep tıisti sheshimin qabyldady. Men ol sheshimge baǵa bermeımin. Biraq akademııalyq adaldyq pen muǵalim mártebesi boıynsha quqyq buzý deregi boldy. Muǵalim mártebesin qoldap, akademııalyq adaldyq boıynsha jaǵdaı jasaý qajet, — dedi depýtat.

Budan buryn habarlanǵandaı, áleýmettik jelide qyzý talqylanǵan NZM oqýshysynyń muǵalimdi balaǵattaý oqıǵasyna baılanysty búgin «Nazarbaev zııatkerlik mektepteri» DBBU basqarma tóraǵasy Ánýar Janǵozın resmı málimdeme jasady. 

Osy oraıda ol Nazarbaev zııatkerlik mektebi óz sheshimin ózgertpeıtinin atap ótti. Oqýshy mektepten shyǵarylyp, memlekettik jalpy bilim beretin mektepke aýystyryldy.