Nazarbaev Zııatkerlik mektepteriniń úzdik muǵalimi anyqtaldy
ASTANA. QazAqparat - Astana qalasynda Nazarbaev Zııatkerlik mektepteri boıynsha jyldyń úzdik muǵalimi anyqtaldy. Úzdik muǵalim ataný úshin Qazaqstannyń ár aımaǵynan 18 adam dodaǵa tústi. Olardyń ishinde matematıka, tarıh, bıologııa, fızıka, ınformatıka, qazaq tili pánderiniń ustazdary bar. Ár qatysýshy mektepishilik irikteý kezeńinen súrinbeı ótip, óz aımaǵynyń úzdigi atanǵan.
Nazarbaev Zııatkerlik mektepteriniń úzdik muǵalimi anyqtaldy
Bul týraly Astana qalasyndaǵy Nazarbaev zııatkerlik mektebiniń baspasóz qyzmeti habarlady.
«Jyldyń úzdik muǵalimi - 2015» baıqaýy 4 kezeńnen turdy. Onda qatysýshylar ózderiniń zııatkerlik, shyǵarmashylyq qabiletterin, aqparattyq-kommýnıkatsııalyq quzirettilikterin kórsetý kerek boldy. Jarystyń birinshi kúni, 19 qarashada ashyq sabaqtar ótkizilse, ekinshi kúni 20 qarashada aqtyq kezeń ótip, jeńimpazdar marapattaldy.
Atalmysh básekeniń basty maqsaty zııatkerlik mektepterdiń daryndy ustazdaryn jáne úzdik pedagogıkalyq tájirıbeni anyqtaý, muǵalimniń jeke damýyn yntalandyrý, oqytýda ınnovatsııalyq tájirıbelerdi paıdalanýdy qoldaý, Zııatkerlik mektepterdiń úzdik ustazdaryna qurmet kórsetý bolyp tabylady.
Jeńimpazdardy marapattaý rásimi Astana qalasyndaǵy Nazarbaev Zııatkerlik mektebiniń jıyn zalynda ótti. Baıqaý jeńimpazdary men júldegerleri aqshalaı jáne baǵaly syılyqtarmen, dıplomdarmen marapattaldy. Qazylar alqasy qatysýshylardyń kásibı sheberligine, jeke qasıetteri men ózindik mánerine, pedagogıkalyq qyzmettiń tıimdiligine basa nazar aýdardy.
Baıqaý qorytyndysy boıynsha, Bas júlde Aqtóbe qalasynyń hımııa-bıologııa baǵytyndaǵy Nazarbaev Zııatkerlik mektebiniń fızıka pániniń muǵalimi Samat Sháripovke buıyrdy. Al birinshi oryndy Petropavl qalasynyń hımııa-bıologııa baǵytyndaǵy Nazarbaev Zııatkerlik mektebiniń fızıka pániniń muǵalimi Larısa Ovchınnıkova qanjyǵasyna baılady. Ekinshi oryndy Kókshetaý qalasyndaǵy fızıka-matematıka baǵytyndaǵy Nazarbaev Zııatkerlik mektebiniń ınformatıka pániniń oqytýshysy Serik Muqanov ıelendi. Al Taldyqorǵan qalasyndaǵy fızıka-matematıka baǵytyndaǵy Nazarbaev Zııatkerlik mektebiniń ınformatıka pániniń ustazy Eraly Bıjanov júldeli úshinshi oryndy qanaǵat tutty.
«Nazarbaev Zııatkerlik mektepteri» derbes bilim berý uıymy tóraıymynyń orynbasary Svetlana Esposynovanyń aıtýynsha, barlyq qatysýshy ustazdar ózderiniń kásibı biliktilikteri men izdenýge degen qushtarlyqtaryn kórsete bildi.
Aıta keteıik, osymen úshinshi ret ótkizilip otyrǵan bul baıqaý eki jylda bir ret qana uıymdastyrylady.
