«Nazarbaev zııatkerlik mektepteriniń úzdik muǵalimi - 2011» konkýrsy jeńimpazdary marapattalady
ASTANA. 26 qarasha. QazAqparat - Búgin elordadaǵy fızıka-matematıkalyq baǵyttaǵy Nazarbaev zııatkerlik mektebinde «Nazarbaev zııatkerlik mektepteriniń úzdik muǵalimi - 2011» konkýrsy jeńimpazdaryn marapattaý rásimi bolady, dep habarlady atalǵan ibilm ordasynyń baspasóz qyzmetinen.
Jyldyń sońyna qaraı uıymdastyrylǵan is-shara muǵalimderdiń kásibı qyzmetterin qorytyndylamaq. Konkýrsqa Astana, Kókshetaý, Óskemen, Taldyqorǵan, Semeı qalalaryndaǵy zııatkerlik mektepterden úsh úmitkerden, barlyǵy 18 aǵylshyn tili, hımııa, fızıka, bıologııa, matematıka jáne taǵy basqa pánderdiń muǵalimderi qatysty. Árbir qatysýshy aldymen óz aımaǵynda mektepishilik irikteýden ótti.
«Úzdik muǵalim - 2011» konkýrsynyń negizgi maqsaty pedagogtardyń shyǵarmashylyq qyzmetin damytý, muǵalim mamandyǵynyń mártebesin ósirý, Nazarbaev zııatkerlik mektepteri muǵalimderiniń kásibı deńgeıin ósirý.
«Úzdik muǵalim - 2011» konkýrsy bes týrdan turady. Qatysýshylarǵa kásibı, ıntellektýaldy, tvorchestvolyq jáne aqparattyq kommýnıkatsııalyq biliktiligin kórsetý qajet. Ádil qazylar úmitkerlerdi bir qatar ólshemder boıynsha synaıdy: kásibı sheberlik, jeke qasıetteri, pedagogıkalyq qyzmetiniń tıimdiligi. Konkýrs nátıjeleri boıynsha ádil qazylar jeńimpazdardy anyqtaıdy. Jeńimpazǵa «Nazarbaev zııatkerlik mektepteriniń úzdik muǵalimi - 2011» degen ataq beriledi.
