Nazarbaev Zııatkerlik mektepteriniń tájirıbesi orta bilimdi damytýǵa negiz bolady - BǴM

ASTANA. QazAqparat - Elimizdegi orta bilim berý salasyn damytýǵa Nazarbaev Zııatkerlik mektepteriniń tájirıbesi negiz bolady. Atap aıtqanda, bul orys mektepterinde qazaq tilin oqytý tájirıbesine qatysty. Bul týraly búgin OKQ uıymdastyrǵan brıfıngte QR Bilim jáne ǵylym mınıstri Aslan Sárinjipov aıtty.

Onyń aıtýynsha, Memleket basshysy Nazarbaev Zııatkerlik mektepteriniń tájirıbesi negizinde orta bilimniń mazmunyn jańartý mindetin alǵa qoıdy. «Ol mektepter biraz tájirıbe jınaqtady, ótken jyldary tek pánder boıynsha ǵana emes, tehnıkalyq jáne gýmanıtarlyq mazmundaǵy aldyńǵy qatarly baǵdarlamalar da jasaldy», - dedi mınıstr.

Mınıstrdiń atap ótýinshe, máselen, qazaq tili boıynsha elimizde arnaıy jumys toby bar. «Jaqyn arada Nazarbaev Zııatkerlik mektepteriniń tájirıbelerine súıene otyryp, orys mektepterinde qazaq tilin oqytýdyń sapasyn jaqsartý boıynsha Úkimetke jáne Memleket basshysyna usynyspen shyqpaqpyz», - dedi A.Sárinjipov.