Nazarbaev zııatkerlik mektepteriniń 153 túlegi 14 eldiń granttaryna ıe bolǵan
ASTANA. QazAqparat - 2014-2015 oqý jyldarynda Nazarbaev zııatkerlik mektepterin elimiz boıynsha 1699 bala oqyp bitirgen. Osy balalardyń 91%-y nemese 1553 bala grantqa ıe bolsa, 153 bala 14 eldiń halyqaralyq bilim granttaryn enshiledi.
Bul týraly búgin Nazarbaev zııatkerlik mektepteri pedagogtarynyń Tamyz konferentsııasy barysynda «Nazarbaev Zııatkerlik mektepteri» AAQ basqarma tóraıymy Kúlásh Shámshıdınova málim etti.
«Bıyl elimizdegi barlyq Nazarbaev zııatkerlik mektepterin 1699 bala bitirdi. Bul osy mektepter ashylǵannan bergi túlekterdiń eń kóp sany. Túlekterimizdiń barlyǵy joǵary oqý oryndaryna, sonyń ishinde 300-den astam bala Astanadaǵy Nazarbaev Ýnıversıtetine oqýǵa tústi. 36 bala Nazarbaev Ýnıversıtetiniń «Foundation» satysyna emes, birden birinshi kýrsyna qabyldandy. Bizdiń mektepti bitirgen oqýshylardyń 88 paıyzy tehnıkalyq, medıtsınalyq, hımııa-matematıka, bılogııa baǵytynda bilim beretin fakýltetterge túsip jatyr»,-deıdi K.Shámshıdınova.
Nazarbaev zııatkerlik mektepteriniń ustazdary aldynda baıandama jasaı kele ol túlekterdiń 4%-y kórshiles úsh eldiń JOO-laryna túskenin, al 153 bala 14 eldiń halyqaralyq granttaryna ıe bolǵanyn maqtanyshpen aıtty.
«Bıyl mektep bitirgen 61 túlek kórshiles úsh eldiń JOO-laryna oqýǵa tústi. 139 bala 17 el boıynsha ýnıversıtetter tańdap, oqýǵa attandy. Al, 153 túlegimiz tereń bilimderiniń arqasynda 14 elden iri-iri halyqaralyq bilim granttaryna ıe boldy»,-dep málim etti K.Shámshıdınova.
