«Nazarbaev Zııatkerlik mektepterine» jasalǵan irikteýler pedagogtardyń kásibıliginiń jetkiliksiz deńgeıin anyqtady
ASTANA. 5 jeltoqsan. QazAqparat /Gúlmıra Alıakparova/ - «Nazarbaev Zııatkerlik mektepteriniń» kadrlardy baǵalaý jáne irikteý tájirıbesi qazaqstandyq pedagogtardyń kásibı deńgeıindegi problemalardy anyqtady.
Bul týraly búgin Astanada bastalǵan «Muǵalimniń kásibı damýy: dástúrleri men ózgeristeri» atty halyqaralyq ǵylymı-tájirıbelik konferentsııada «Nazarbaev Zııatkerlik mektepteri» DBBU Basqarma tóraıymy Kúlásh Shamshıdınova málim etti.
Zııatkerlik mektepterge muǵalimderdi irikteýden ótýge shaqyrǵanda, joǵary jalaqy, joǵary deńgeıdegi materıaldyq-tehnıkalyq jabdyqtalý jáne mekteptiń joǵary bedeli bizge úzdikterdiń úzdikterin tartady dep úmittendik. Kóp jaǵdaıda solaı boldy, biraq, onymen birge, Zııatkerlik mektepterdiń kadrlardy baǵalaý jáne irikteý tájirıbesi qazaqstandyq pedagogtardyń kásibı deńgeıindegi problemalardy anyqtady. Konkýrstyq irikteýler birinshi jáne joǵary sanatty, óz páni boıynsha joǵary deńgeıdegi bilimi bar muǵalimderdiń, mysalǵa, aqparattyq tehnologııalar salasynda bolmasa, bilim berýdiń jańa ádistemelerin paıdalaný salasynda habary jetkiliksiz ekendigin kórsetti», - dedi ol.
K.Shamshıdınova atap kórsetkendeı, atalǵan faktiler jáne ustazdardy irikteý, olardyń biliktiligin kóterý máseleleri boıynsha halyqaralyq tájirıbege jasalǵan taldaýlar, Zııatkerlik mektepterde pedagogtardyń biliktiligin arttyratyn arnaıy júıeniń qurylýyna negiz saldy. Bul óz kezeginde Qazaqstanda muǵalimderdiń biliktiligin udaıy arttyryp otyrý ıdıasyn júzege asyrýǵa septigin tıgizdi.
Alǵashqy jasalǵan monıtorıngtiń nátıjesi boıynsha, pedagogtyń kásibıligin arttyrýdyń derbes syzbasy ázirlenip, olardy kelesideı modýldar boıynsha oqytý uıymdastyryldy: 1 - aqparattyq-kommýnıkatsııalyq tehnologııalar; 2 - qazaq tili; 3 - aǵylshyn tili; 4 - «pedagogıkalyq bilimder».
«Modýldardyń jıyntyǵy Zııatkerlik mektepterde oqytý úrdisinde aqparattyq-kommýnıkatsııalyq orta múmkindikterin tıimdi qoldaný, kóp tildi saıasatty júzege asyrý, yqpaldastyrylǵan bilim berý baǵdarlamalaryn engizý jáne ózge de talaptarǵa sáıkes jasaldy. Árbir modýl úsh deńgeıden turady jáne onyń qıyndyq dárejesi artyp otyrady», - dedi Basqarma tóraıymy.
K.Shamshıdınova atap kórsetkendeı, muǵalimderdiń biliktiligin arttyrý júıesine: mektepishilik kýrstar, el ishindegi kýrstar, shet elderdegi kýrstar jáne online, offline kýrstary kiredi.
