Nazarbaev zııatkerlik mektepterinde ozyq amerıkandyq sandyq zerthanalar ashylǵan (FOTO)
ASTANA. QazAqparat - Nazarbaev zııatkerlik mektepterinde fızıka, hımııa jáne bıologııa pánderin ótkizýde jetekshi amerıkandyq "Pasco" kompanııasynyń sandyq zerthanalary paıdalanylady. Bul týraly Qazaqstandaǵy "Pasco" resmı dıleri - «Interactiv Kazakhstan» JShS bas dırektory - Nurlan Quraqbaı habarlady.
"Nazarbaev zııatkerlik mektepterinde paıdalanylatyn bul qurylǵylar bilim jáne ǵylymnyń álemdik standarttaryna saı zerthanalyq jumystar júrgizýge jol ashady", - dedi ol.
"Spark" zerthana keshenine qurylǵyny tirkeıtin oqý quraly, hımııalyq qurylǵy (temperatýra, qýat, absolıýtti qysym, suıyqtyqtaǵy pH), sý sapasyn anyqtaıtyn qurylǵy (temperatýra, pH, ISE, TQP, otteginiń erýi men ótkizgishtigi), aýa raıyn anyqtaıtyn qurylǵy (temperatýra, barometrlik qysym, salystyrmaly jáne absolıýtti ylǵaldylyq, jeldiń jyldamdyǵy men ekpini jáne t.b), tyǵyzdyqty anyqtaıtyn jabdyq, tarazy, jylytqysh plıta, tamshy eseptegishi, magnıtti bulǵaýysh, hımııa boıynsha tájirıbe qurylǵylary, suıyqtyq elektrolızi, qosylystardy bólý, hromotografııa, elektr ótkizgishtigi, hımııalyq baılanystar, qyshqyldar men negizderiniń qurylǵylary, sonymen birge qozǵalys, jaryq, dybys, kómirqyshqyl gazynyń jáne t.b. qurylǵylary kiredi. «Interactiv Kazakhstan» mektepterde osyndaı zerthanalar ornatqan soń muǵalimder úshin arnaıy kýrstar ótkizedi. Muǵalimder zerthanaǵa qatysty saýaldaryn onlaın rejımde de joldaı alady. Búginde "Pasco" zerthana keshenderin paıdalanýdyń ádistemelik nusqaýlary qazaq jáne orys tilderine aýdarylǵan.
