Nazarbaev zııatkerlik mektepterinde oqýshylardy irikteýdiń jańa júıesi engiziledi
ASTANA. 20 tamyz. QazAqparat - Bıyl qyrkúıek aıynda biz Nazarbaev zııatkerlik mektepterinde oqýshylardy irikteýdiń jańa júıesin tájirıbeden ótkizetin bolamyz.
Bul týraly búgin Astanada bastalǵan Qazaqstan pedagogtarynyń tamyz konferentsııasynda «Nazarbaev Intellektýaldy mektepteri» AQ basqarmasynyń tóraıymy Kúlásh Shámshıtdınova aıtty.
Onyń habarlaýynsha, atalǵan júıeni ázirleý jumysyna Gollandııanyń «SITO» atty pedagogıkalyq ınstıtýty jáne AQSh-tyń Djons Hopkıns atyndaǵy daryndy jastar ortalyǵy qatysty. «Jańa júıe irikteý konkýrsyna shydaı alatyn oqýshylardy anyqtap qana qoımaı, olardyń Nazarbaev zııatkerlik mektebinde bilim alýǵa qanshalyqty daıyn ekenin kórsete alady. Ol kompıýterlik testileýge negizdelip, tórt pán boıynsha tıisti tapsyrmalardy qamtıdy. Árıne, balanyń jaratylystaný-matematıka ǵylymdaryn oqý qabiletine negizgi basymdyq beriledi», - deıdi K.Shámshıtdınova.
Basqarma tóraıymy atap kórsetkendeı, jańa irikteý júıesi tájirıbeden ótkennen keıin, ony barlyq mektepterge engizip, 7-shi synypty bitirgen oqýshylar Nazarbaev zııatkerlik mektepterine irikteletin bolady.
