Nazarbaev zııatkerlik mektepteri óz jetistikterin kórsetedi
ASTANA. QazAqparat - Búgin, aqpannyń 18-i kúni «Nazarbaev zııatkerlik mektepteri» AQ osy ýaqytqa deıin atqarylǵan jumystar boıynsha esep berip, mektep oqýshylarynyń jetistikterin pash etpek, dep habarlaıdy QazAqparat tilshisi.
Elordanyń «Astana» atty kontsert zalynda (burynǵy Kongress-xoll) saǵat 16:00-de ótetin esep berý sharalary barysynda Nazarbaev zııatkerlik mektepteriniń oqytý men tárbıe berý jumystary tanystyrylady. Arnaıy sheberlik sabaqtary uıymdastyralady. Sondaı-aq mektep oqýshylarynyń óz qolymen jasaǵan buıymdary arnaıy satylym kórmesine shyǵarylatyn bolady.
«Biz alǵash ret Nazarbaev zııatkerlik mektepterinde oqıtyn balalardyń jumystaryn xalyqtyń nazaryna usynamyz», - deıdi «Nazarbaev zııatkerlik mektepteri» AQ basqarma tóraıymy Kúlásh Shámshıdınova. Onyń aıtýynsha, kontsert zalyn 1,8 mln. teńgege jalǵa alýǵa týra keldi. Biraq ol aqshany demeýshiler ótep berýge nıet bildirdi.
Aıta keteıik, Nazarbaev zııatkerlik mektepterin qurýdyń basty maqsaty - bilim berý salasyndaǵy úzdik tájirıbeni jınaqtap, otandyq mektepterge taratý. Osyǵan oraı, búginde eldiń túkpir-túkpirinen keletin muǵalimder zııatkerlik mektepterdiń bazasynda óz bilimderin shyńdap, bilim berýdi jańasha júrgizýge úırenip júr.
