Nazarbaev zııatkerlik mektepteri Jusan-dy elge qaıtarýǵa qatysty málimdeme jasady

ASTANA. QazAqparat - «Nazarbaev zııatkerlik mektepteri» qarjylandyrý kózi týraly málimdeme jasady, dep habarlaıdy QazAqparat.

Vedomstvonyń habarlamasyna sensek, zııatkerlik mektepter negizinen memleket bóletin qarajat esebinen óz jumysyn jalǵastyryp jatyr.

Derbes bilim berý uıymyn bıýdjettik qarjylandyrý turaqty júrip jatyr.

«Sonymen qatar zııatkerlik mektepterdi odan ári damytý úshin bıýdjetten tys qarajat esebinen qarjylandyrý úlesin birtindep ulǵaıtý josparlanǵan. Bıýdjetten tys qarjylandyrýdy ulǵaıtý zııatkerlik mektepterdegi bilim sapasyn jaqsartýǵa, oqýshylar men pedagogter úshin bilim berý protsesiniń jaılylyǵyn arttyrýǵa múmkindik beredi dep boljanǵan bolatyn. Bıýdjetten tys kózderden qarjylandyrýdyń bolmaýy belgili bir dárejede NIS ekojúıesiniń odan ári serpindi damý múmkindikterin shekteıdi» dep málim etti uıym.

«Nazarbaev zııatkerlik mektepteri» Jusan tobyna qatysty is boıynsha prokýratýramen tyǵyz baılanysta.

«Máseleniń sońy búkil respýblıkadaǵy zııatkerlik mektepter oqýshylarynyń paıdasyna sheshiledi dep senemiz» deıdi NZM.

Eske sala keteıik, búgin Bas prokýratýra Jusan tobyn Qazaqstanǵa qaıtarý jumysy júrgizilip jatqanyn habarlady.

2020 jylǵy 27 sáýirde Jusan tobynyń ıesi «Pioneer Capital Invest» JShS qatysýshylarynyń jalpy jınalysynda Pioneer múlkin shetelde tirkelgen Jusan Technologies Ltd kompanııasynyń jarǵylyq kapıtalyna berýdi maquldaý týraly sheshim qabyldaǵan.

Bul áreketter qoǵamdyq múddege, onyń ishinde «Nazarbaev Ýnıversıteti» men «Nazarbaev zııatkerlik mektepteriniń» ondaǵan myń qazaqstandyq stýdenti men oqýshylarynyń múddesine qaýip tóndirdi.

Sebebi «Jusan» tobynyń aktsııalary, oblıgatsııalary men depozıtteri boıynsha dıvıdendteri - atalmysh oqý oryndaryn qarjylandyrý kózderiniń biri.

Foto: nis.edu.kz