«Nazarbaev zııatkerlik mektepteri» bazasyndaǵy bilim júıesi bolashaqta orta bilim beretin mektepterge engiziledi
ASTANA. 13 qarasha. QazAqparat - «Nazarbaev zııatkerlik mektepteri» bazasynda jasalyp jatqan jumystardyń barlyǵy bolashaqta orta bilim beretin mektepterge beriledi.
Bul týraly búgin Astanada ótip jatqan «Bilimdegi joǵary sapa men kóshbasshylyq - 2013» halyqaralyq konferentsııasynda «Nazarbaev zııatkerlik mektepteri» derbes bilim berý uıymynyń basqarma tóraıymy Kúlásh Shamshıdınova aıtty.
«Nazarbaev zııatkerlik mektepteri» bazasynda jasalyp jatqan jumystardyń barlyǵy bolashaqta orta bilim beretin mektepterge beriledi. Sondyqtan biz qazir kópshilik nazaryna zamanaýı orta bilimniń qandaı bolý kerektigin jetkizýge kúsh salýdamyz. Bul rette orta bilimniń qurylymy tek Qazaqstanda ǵana emes, búkil dınejúzinde ózgerip jatqandyǵyn basa aıtý qajet», - dep atap ótti K. Shamshıdınova.
Aıta ketý kerek, is-sharany «Nazarbaev Zııatkerlik mektepteri» derbes bilim berý uıymy ótkizedi. Sharaǵa halyqaralyq jáne qazaqstandyq spıkerler, QR BǴM ókilderi, qazaqstandyq joǵary oqý oryndary, Ulttyq testileý ortalyǵy, eldegi Zııatkerlik jáne jalpy bilim berý mektepterinen 400-ge jýyq adam qatysýda.
Konferentsııada «Bilim paradıgmasynyń ózgerýi», «Bilimdegi jańa ádistemeler men tehnologııalar», «Muǵalimderdiń biliktiligin arttyrý», «Mektepterde úshtildikti engizý», «Qazaqstan tarıhy, qazirgi zamandaǵy Qazaqstan pánderi arqyly patrıotızmdi qalyptastyrý», «Oqýshylardy synı baǵalaý», «Test arqyly daryndy jáne talantty balalardy anyqtaý», «Mektep - ýnıversıtettiń seriktestigi», «Zertteýshilik, jobalaý jumysy» jáne t.b. taqyryptar talqylanady.
