Nazarbaev zııatkerlik mektepteri alǵash ret óz jetistikterin kópshilikke pash etpek
ASTANA. QazAqparat - Aqpannyń 18-i kúni «Nazarbaev zııatkerlik mektepteri» AQ osy ýaqytqa deıin atqarylǵan jumystar boıynsha esep bermek, dep habarlaıdy QazAqparat tilshisi.
«Sol kúni saǵat 16:00-de Astanadaǵy eski Kongress-xolda (qazirgi «Astana» kontsert zaly) esep berý sharalary ótedi. Onda barlyq Nazarbaev zııatkerlik mektepteriniń oqytý men tárbıe berý jumystary tanystyrylady. Arnaıy sheberlik sabaqtary uıymdastyralady. Sondaı-aq mektep oqýshylarynyń óz qolymen jasaǵan buıymdary arnaıy satylym kórmesine shyǵarylatyn bolady. Biz alǵash ret Nazarbaev zııatkerlik mektepterinde oqıtyn balalardyń jumystaryn xalyqtyń nazaryna usynamyz», - dedi «Nazarbaev zııatkerlik mektepteri» AQ basqarma tóraıymy Kúlásh Shámshıdınova búgin Astanada ótken bir jıynda. Óz sózinde ol kontsert zalyn 1,8 mln. teńgege jalǵa alýǵa týra kelgenin, biraq ol aqshany demeýshiler ótep berýge nıet bildirgenin jetkizdi.
Aıta keteıik, bıylǵy Joldaýǵa arnalǵan jıynda Shámshıdınova «biz bilmeıtin» mamandyqtardy jarııalady.
Onyń aıtýynsha, balany bárin bilýge úıretken jaqsy. Biraq ol sony paıdalana almasa, búkil eńbektiń zaıa ketkeni.
«Bir ǵana mysal keltireıin, jýrnalıster Eınshteıinniń mektep baǵdarlamasyndaǵy keıbir formýlalardy bilmeıtinin estip, oǵan suraq qoıypty. Nobel syılyǵynyń laýreaty mektep baǵdarlamasyn bilmeı, syılyqty qalaı alǵanyn suraǵanda Eınshteın: «Meniń kabınetinde bir shkaf bar. Onyń ishinde menen de artyq biletin entsıklopedııalar jatyr. Biraq Nobel syılyǵyn shkaf emes, men aldym», dedi ol. Mine, osy mysaldyń ózi balanyń jadysyn aqparatpen toltyra berýden eshbir paıda joq ekenin kórsetedi. Balany aqparatpen jumys isteýge, ony taldaýǵa úıretý kerek. Ol ózine qajetti aqparatty taba bilýi kerek », - dep atap kórsetti Shámshıdınova.
