Nazarbaev Zııatkerlik mektebiniń ujymy ata-anasy joq stýdentke páter alyp berdi
Mektep ujymy Erkejan Ersinqyzynyń turǵyn úı jınaq qoryna 2013 jyldan beri qarjy aýdaryp kelgen.
«Qazaqta «Jetim kórseń, jebeı júr» -degen jaqsy bir sóz bar. Urpaq tárbıeleýshi retinde bizdi dál osy Erkejandaı jastarymyzdyń keleshegi alańdatady. Qyzymyzdyń baspanaly bolý týraly armanyna qol jetkizýine sebepshi bolǵanymyz úshin qýanyshtymyz. Páterdi Erkejannyń ózi tańdady. Tek qujat rásimdeýge kómektestik. Bul baspana oǵan qut-bereke ákeletin shańyraq bolsyn dep tileımiz», - deıdi mektep dırektory Baǵdan Qaıyrjanov.
Erkejannyń ózi mundaı qýanyshty habarǵa alǵashynda senbepti.
«Óz baspanam bolýyn armandasam da, aıaqasty úıli bolamyn dep esh oılamaǵan edim. Mektepten habarlasyp, seniń bankte esep-shotyń bar, sol shottaǵy aqshaǵa úı alyp beremiz degende múldem sene almadym. Qýanyshtan tolqyp turmyn. Ómirde qaıyrymdy, janashyr adamdardyń bar ekenine kózim jetti», - deıdi Erkejan Ersinqyzy.
19 jastaǵy stýdent ákesinen sábı kezinde, al anasynan 12 jasynda aıyrylypty. Sońǵy 5 jyldan beri ol týysqan aǵasynyń úıinde turyp kelgen. Qazir Aıagóz qalasyndaǵy polıtehnıkalyq kolledjdiń 3 kýrsynda «Baǵdarlamashy» mamandyǵynda oqyp júr. Onyń bilimin ýnıversıtette jalǵastyrsam degen armany bar.
