Nazarbaev Zııatkerlik mektebiniń muǵalimderi aǵylshyn tilin joǵary dárejede bilýge mindetti - S. Qadyrova
ALMATY. QazAqparat - Nazarbaev Zııatkerlik mektebiniń muǵalimderi aǵylshyn tilin joǵary dárejede bilýge mindetti. Bul týraly búgin Almatyda Naýryzbaı aýdanynyń Qalqaman-2 yqshamaýdanynda hımııa-bıologııa baǵytynda oqytatyn Nazarbaev Zııatkerlik mektebiniń ashylýy rásimi barysynda atalmysh mektep dırektorynyń ǵylymı-ádistemelik jumystar boıynsha orynbasary Saltanat Qadyrova málimdedi.
«Muǵalimder arasynda baıqaý óte kúrdeli boldy. Bir orynǵa 10-nan astam adam úmitker boldy. Baıqaý úsh kezeńnen turdy. Birinshi, olar kúrdeliligi óte joǵary test tapsyrdy, ekinshi ózi jáne mamandyǵy jaıly esse jazdy, úshinshi qazylar alqasymen áńgimelesý boldy. Al qazylar alqasynyń quramyna Nazarbaev Zııatkerlik mektepteriniń ustazdary jáne mektep dırektory endi. Bizde áli muǵalimerge qatysty bos qyzmet oryndary bar. 1 qyrkúıekke deıin áli jumysqa qabyldaımyz. Muǵalimer aǵylshyn tilin bilýge mindetti. Tipti óz isiniń mamany bola tura aǵylshyn tilin bilmeıtin bolsa, oqý jyly barysynda ony úırenýge belgili bir merzim beriledi », - dedi S. Qadyrova.
Sonymen qatar ol, mektepke oqýshylar elimizdiń túkpir-túkpirinen kelgendigin jetkizdi.
«Mektebimizde tek almatylyq qana emes, elimizdiń basqa da óńirlerinen kelgen balalar bar. Baıqaý boıynsha bir orynǵa 10 oqýshydan keldi. Qazirgi tańda barlyǵy 790 oqýshy qabyldandy. Endi sabaqtar qazaq jáne orys tilinde júrgiziletin bolady. Al 11-shi jáne 12-shi beıindi synyptarda oqýshylar sabaqtardy aǵylshyn tilinde oqıdy. Bir synypta 20-24 oqýshydan bolady. Biraq, olar toptarǵa bólinedi. Bir topta 12 oqýshydan bolady», - dedi S. Qadyrova.
Aıta ketelik, mektepke oqýshylar 7-shi synyptan bastap qabyldanady. Olar túser kezde aldymen matemetıkadan, qazaq, orys, aǵylshyn tilderinen emtıhan jáne logıkalyq test tapsyrady.
