Nazarbaev Zııatkerlik mektebiniń bilim standartyn jappaı engizý – tarıhı qadam
Tájirıbeli ustaz Memleket basshysy Nursultan Nazarbaevtyń jyldaǵy dástúrmen jasaǵan sońǵy Joldaýy - elimizdegi eń mańyzdy saıası oqıǵala retinde qabyldanatyn tarıhı qujat ekendigin aıtty.
«Joldaýdan Qazaqstan halqy úlken úmit, jaqsylyqqa umtylys, jańalyq kútip úırengeni ras. Elimizdiń áleýmettik-ekonomıkalyq ál-aýqatyn kóterýge baǵyttalǵan bıylǵy Joldaý ózgeshe formatta ótýimen el nazaryn aýdardy. Prezıdent halyqtyń jaǵdaıy men memleket damýyna jaýap beretin árbir sala jetekshileriniń jumysyn synǵa aldy. Jaltarýǵa, jaýyrdy jaba toqýǵa jol bermeı, sala jumysy boıynsha kózbe-kóz esep surady. Bul ne degen sóz? Eń aldymen, Prezıdent halyqtyń jaǵdaıynan jaqsy habardar. Prezıdent Qazaqstannyń árbir adamy úshin, tutas halqy úshin alańdaıtynyn, sát saıyn qamqorlyq jasalý keregin, mınıstrlerdiń, ákimderdiń sol maqsat úshin taǵaıyndalyp, halyqqa qyzmet etý - basty mindet ekenin eske saldy. Bul memleketimizdiń áleýmettik, demokratııalyq aıqyn sıpatyn aıǵaqtaı túsedi», - dedi ol.
Muǵalimniń aıtýynsha, Elbasy Joldaýynan soń mektepterdi reformalaýdyń sońǵy núktesi qoıyldy.
«Prezıdent barlyq memlekettik orta bilim berý oryndaryn Nazarbaev Zııatkerlik mektepteriniń standarttaryna keltirý mindetin naqtylap belgilep berdi. Árıne, meje bıiktigine umtylys birte-birte oqý-materıaldyq bazanyń da sáıkes jabdyqtalýyna septigin tıgizedi dep oılaımyn. Rasynda da, sońǵy jyldarda mektep damýynda biraz belgisizdiktiń beleń alǵany belgili. Endigi jerde Nazarbaev Zııatkerlik mektepteriniń úlgisi barlyq orta mektepter úshin birden-bir mindetti baǵdar bolatyn boldy. Búldirshinderdi erte bastan damytýdyń biregeı standartyn túzgen óz memlekettik baǵdarlamamyzdyń bolýyn Elbasymyz oryndy eskertip ketti. Olardyń oń júzege asýyna negiz bolatyn keıbir máselelerdiń basyn ashyp berdi. Ásirese, bilim berýdi damytý jolynda Kembrıdj úlgisindegi Nazarbaev Zııatkerlik mektepteriniń bilim standartyn tańdaýdyń bir izge salynýyn tarıhı sheshýshi qadam dep bilemin. Bul qazaqstandyq jastardyń jappaı shetelge aǵylyp, shetelde ǵana oqýdy murat tutyp, eýropalyq bilim standartyn mártebe tutýyna tosqaýyl bolatyny anyq. Endigi jerde Eýropa úlgisindegi úzdik mektepterdiń tájirıbesin tek NZM ǵana emes, elimizdegi barlyq mektepterge engizse, sapaly jetkinshekter tárbıeleýge mol múmkindik týady. Biz, Qazaqstan pedagogtary, osy jańa talaptyń údesinen shyǵýǵa umtylýymyz kerek. Sebebi, elimiz básekege qabiletti 30 eldiń qataryna qosylý úshin biz tárbıelegen shákirtter básekege qabiletin tanyta alýy kerek», - dedi Elmıra Súleımanova.
Aıta ketý kerek, Prezıdent Nursultan Nazarbaev Aqordada Qazaqstan halqyna Joldaýyn jarııa etti.
Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.
