«Nazarbaev Zııatkerlik mektebinde» konkýrstyq irikteýdiń jańa júıesi engizilýde
ASTANA. 23 tamyz. QazAqparat - 2012 jyly «Nazarbaev Zııatkerlik mektebinde» oqýshylardy konkýrstyq irikteýdiń jańa úrdisi qoldanylatyn synama testileý ótkiziledi, dep habarlady atalmysh bilim berý uıymy basqarma tóraǵasynyń orynbasary Kúlásh Shamshıdınova Pm.kz saıtyna.
«Bıyl biz oqýshylardy testilik irikteýdiń Cito pedagogıkalyq ólshemder ınstıtýtymen, Djon Hopkıns ýnıversıtetiniń Daryndy jastar ortalyǵymen jáne Kembrıdj ýnıversıtetimen birlesip jasalǵan jańa júıesi boıynsha synama testileýdi júrgizemiz. Ol oqýshylardyń bilim deńgeıi men ony paıdalana bilýin, sondaı-aq jaratylystaný-matematıka baǵytyndaǵy baǵdarlamalar boıynsha oqýǵa qabilettiligin tekserýge baǵyttalǵan», - dedi K.Shamshıdınova.
Buryn oqýshylardyń tek naqty bilimderi ǵana tekseriletin, endi nazar alǵan bilimdi paıdalana bilý qabiletin anyqtaýǵa aýdarylyp otyr dep atap aıtty ol.
Budan basqa, Kembrıdj ýnıversıtetimen birlesip ázirlengen, alǵan bilimdi praktıkada qoldanýǵa baǵyttalǵan jańa bilim berý baǵdarlamalary ústimizdegi jyly synaqtan ótkiziletin bolady.
Sonymen qatar, jalpy bilim beretin mektepter muǵalimderiniń biliktiligin kóterý jónindegi deńgeılik baǵdarlamalardy ázirleý de jalǵasýda. Ekinshi deńgeı aıaqtalyp, jattyqtyrýshylardy daıarlaý bastaldy. Kelesi jyldyń qańtarynan bastap jattyqtyrýshylardy birinshi deńgeı boıynsha daıarlaýdy bastaý josparlanýda.
