Nazarbaev Zııatkerlik mektebi plagıatty túbirimen joıdy
ASTANA. QazAqparat - Nazarbaev Zııatkerlik mektebinde plagıat túbirimen joıyldy. Bul týraly búgin bilim berý salasy qyzmetkerleriniń dástúrli tamyz keńesi barysynda «Nazarbaev Zııatkerlik mektebi» AQ Basqarma tóraǵaıymy Kúlásh Shámshıdınova málim etti.
«Biz plagıatty túbirimen joıdyq. Esterińizde shyǵar, biz osyǵan qatysty jazalaǵan kezderimiz de boldy, sondaı qabyldanǵan qatań sharalar óz nátıjesin berip otyr. Sondyqtan da, bıyl plagıat joq dep málimdeı alamyn», - dedi K. Shámshıdınova.
Budan bólek, Basqarma tóraıymy aldaǵy ýaqytta Nazarbaev Zııatkerlik mektebinde bilim berýdi saralandyrý máselesine keńinen nazar aýdarylatynyn, oqý baǵdarlamalaryn jedel ıgerý máselesine jiti kóńil bólinetinin atap ótti.
«Kelesi jyldan bastap Nazarbaev Zııatkerlik mektepterin merziminen buryn aıaqtaý tetikterin engize bastaýymyz kerek. Biz osy baǵytta bes jyl boıy jumys istep, yqpaldastyrylǵan bilim baǵdarlamalaryn engizip kelemiz. Mektepke óte alǵyr, kúshti balalardy iriktep alyp, oqytyp jatyrmyz. Sondyqtan da, talantty oqýshylardyń bizdiń mektebimizdi merziminen buryn támamdaýǵa quqylary bar. Alaıda, bul úshin biz áli de kóp jumys jasaýǵa tıispiz. Eń bastysy, Zııatkerlik mektepterin jedel tártippen merziminen buryn támamdaǵan túlekter erteńge joǵary oqý oryndarynda keri áserge tap bolmaýy tıis», - dedi K. Shámshıdınova. Onyń aıtýynsha, Nazarbaev Zııatkerlik mektepteri aǵymdaǵy jyly dál osy baǵyttaǵy tetiktermen jumys isteýdi jalǵastyratyn bolady.
