Nazarbaev zııatkerlik mektebi MS Saılaýbek týraly jazylǵan oqýlyqqa túsinik berdi
ASTANA. QazAqparat - Nazarbaev zııatkerlik mektebinde reper MS Saılaýbek týraly jazylǵan «Qazaq tili» oqýlyǵyna qatysty túsinik berdi, dep habarlaıdy «QazAqparat» HAA tilshisi.
«Atalǵan «Qazaq tili» jınaǵynyń qurastyrylýyna jáne basylyp shyǵýyna «Nazarbaev zııatkerlik mektepteri» derbes bilim berý uıymynyń qatysy joq. Kitap jekemenshik jolmen shyǵarylǵan. Atalǵan mazmundaǵy test tapsyrmalary zııatkerlik mektepterge túsý úshin konkýrstyq irikteýde qoldanylmaıdy,» - dedi «Nazarbaev Zııatkerlik mektepteri» Derbes bilim berý uıymy Pedagogıkalyq ólsheýler ortalyǵy dırektorynyń orynbasary Aıdana Shılibekova.
Aıta ketsek, buǵan deıin óziniń feısbýk paraqshasynda Kıikbaı Jaqypuly esimdi qoldanýshy «Masqara! Nazarbaev mektebine túsý úshin arnalǵan suraqtardyń ishinde Saılaýbekti ( ııa kádimgi túsiniksiz repper ) bilý kerek! Aıtarym joq... ne bolyp ketti!» degen jazbamen vıdeo qaldyrǵan bolatyn. Vıdeoda Qazbek Saǵıdolda men Serikbolsyn Dúısembaı atty avtorlardyń jazǵan kitaptarynda MS Saılaýbek týraly málimet pen test suraǵy berilgen.
«Qazaq tiline Nazarbaev mektebine daıyndalatyn kitap. Іshinde 75-shi bette Saılaýbek týraly aıtylǵan. Nege qazaqtyń basqa tulǵalary jaıly aıtylmaıdy. Nege MS Saılaýbek aıtylady. Sonshalyqty ol ne eńbek sińirdi», - delingen vıdeoda.
Vıdeoda atalǵan oqýlyqtyń alǵashqy betterinde «Nazarbaev zııatkerlik mektepterine túsýshilerge arnalǵan test tapsyrmalary jınaǵy» dep jazylǵan.
