Nazarbaev Zııatkerlik mektebi Kembrıdj ýnıversıtetimen birge jańa bilim baǵdarlamasyn jasap shyǵardy

Bul týraly búgin mektep qabyrǵasynda ótken baspasóz máslıhatynda «Nazarbaev Zııatkerlik mektebi» derbes bilim berý uıymynyń basqarma tóraǵasy Kúlásh Shámshıdınova málim etti.

«Biz Qazaqstan standarttaryn zerttedik, sondaı-aq TIMSS jáne PISA halyqaralyq zertteýleri boıynsha úlken jetistikterge jetken, ekonomıkasy damyǵan memleketterdiń tájirıbesin zerdeledik. Biraq bilim júıesinde qoldanylyp júrgen tájirıbeni zertteý azdyq etedi. Biz ýaqyt talabyn túsinip, álemde ne bolyp jatqandyǵyn da eskerýimiz shart. Sebebi 20 jyldan keıin biz eńbek naryǵynyń qaı baǵytqa qaraı ózgeretinin, qandaı mamandyqtar suranysqa erekshe ıe bolatynyn, kelesi býyn ókilderiniń aldynda nendeı máseleler týyndaıtynyn oılaýymyz kerek. Osy maqsatta halyqaralyq konferentsııalardyń materıaldaryn eskere otyryp, álemniń barlyq tájirıbesin toǵystyryp, biz Kembrıdj ýnıversıtetimen birge jańa bilim baǵdarlamasyn jasadyq», - dedi K.Shámshıdınova.

Uıym basshysy habarlaǵanyndaı, álemde jáne Qazaqstanda bar eń ozyq baǵdarlamalardy engizip, onyń aprobatsııasyn ótkizetin Nazarbaev Zııatkerlik mektebi bolady. Keıin bul tájirıbe Elbasy N.Nazarbaevtyń tapsyrmasy boıynsha, elimizdiń ózge mektepterine de taratylatyn bolady.

«Bizdiń túpki maqsatymyz jobany sheteldiń úzdik ýnıversıtterinen bilim berý baǵdarlamalaryn kóshirý bolǵan joq. Biz otandyq mamandardyń áleýetin qoldanyp, ózimizge saı baǵdarlamany jasap shyǵarýǵa tyrystyq», - dedi mektep basshysy.

Qazirgi tańda atalǵan joba Kembrıdj ýnıversıtetiniń Halyqaralyq Emtıhan Keńesimen birlesip, júzege asyrylyp jatyr. 2012 jyly oqýshylardyń fýnktsıonaldyq saýatyn qalyptastyrýǵa baǵyttalǵan barlyq pánder boıynsha 60 oqý jospary jáne 40 kiriktirilgen bilim berý baǵdarlamalaryn engizý jumystary bastalǵan. 2013 jyly kiriktirilgen baǵdarlamalar jetildirilip, 90-nan astam jańa oqý josparyn ázirleý kózdelýde.

Atap aıtar basty jaıt, bastaýysh mektepte jańa pánder engizilgen, al negizgi mektepte «Fızıka» jáne «Hımııa» pánderin meńgerý 6-synypta bastalady. Sondaı-aq joǵary mektepte ıgeriletin pánderdiń sany azaıyp, naqty joǵary oqý oryndaryna túsýge baǵyttalǵan daıyndyqtar júrgiziledi.