Nazarbaev: Jastardy ósirip, qanat qaqtyrý - kez kelgen prezıdenttiń róli
ASTANA. QazAqparat - QR Prezıdenti Nursultan Nazarbaev reseılik «Rossııa 24» arnasyna bergen suhbatynda jastar máselesine toqtaldy, dep habarlaıdy QazAqparat.
«Qazir ýaqyt oqtyń jyldamdyǵyndaı jedel damýda. Biz onyń artynan ilese almaýdamyz. Ǵylymı jetistikterdiń, progrestiń, jańa tehnologııalar men ındýstrıalandyrýdyń kóz ilespes jyldamdyǵy taǵy bar. Eger bilimdar urpaq bolmasa, onyń barlyǵyn kim ıgeredi?! Sondyqtan qıyndyqtarǵa qaramastan, men barsha álem boıynsha qazaq jastaryn oqytýǵa tyrystym. Memleket arnaıy stıpendııa taǵaıyndady. Jastardy 22 jyldan beri shet memleketterde oqytyp jatyrmyz. On myńdaǵan jas bilim alyp, elge oraldy», - dedi Elbasy.
N.Nazarbaevtyń sózi boıynsha, qazir, onyń ústine, Qazaqstanda ýnıversıtetterdiń deńgeıi ósti.
«Mysaly, Nazarbaev Ýnıversıteti amerıkalyq, eýropalyq iri joǵary oqý oryndarymen bir deńgeıde tur. Oǵan jastardy daıyndaý úshin, 20 zııatkerlik mektep jumys isteıdi. Oǵan ishki jáne halyqaralyq olımpıadalar jeńimpazdary, óte daryndy balalar qabyldanady. Osynyń arqasynda eldegi barlyq joǵary oqý oryndary óz deńgeılerin kóterýde. Ál-Farabı atyndaǵy Qazaq ulttyq gýmanıtarlyq ýnıversıteti, L.Gýmılev atyndaǵy Eýrazııa ulttyq ýnıversıteti, Almatydaǵy tehnıkalyq ýnıversıtet, bizdiń eldiń eń úzdik 10 ýnıversıtetteri álemniń úzdik 500 joǵary oqý oryndarynyń deńgeıine deıin ósip otyr. Jáne bul bizdi óte qatty qýantady. Ol jerde de tamasha jastar oqytylyp shyǵarylýda», - dep atap ótti Memleket basshysy.
Prezıdent, sonymen qatar Úkimet quramynda atqarýshy laýazymdarda jastardyń qarasy kóp ekendigin tilge tıek etti.
«Bolashaqtyqtar» qazir úkimette bildeı laýazymdardy atqarýda. Bizdiń birneshe mınıstrimiz 35-36 jasta. Artylǵan mindetti jaqsy atqarýda, olar jaqsy mektepten ótti. Úkimettiń basqarýshy qyzmetinde otyrǵan laýazym ıeleriniń jasy 35-45 jas aralyǵynda. Ótken qatelikterdi qaıtalamaı, Qazaqstandy alǵa jeteleıtin jastardy daıyndaýymyz kerek. Olar mindetti túrde óte bilimdi bolǵany jón. Barlyq mektepterde úsh tildi - qazaq, orys jáne aǵylshyn tilderin oqytý jolǵa qoıylǵan. Joǵary synyptarda matematıka, hımııa men fızıka aǵylshyn tilinde oqytylady, ýnıversıtetterge ótkende aǵylshyn tilinde bilim alady. Bul - ýaqyt talaby. Odan esh qasha almaımyz. Ǵylymı jańalyqtardy birinshi kózden bilip, ǵylymı jýrnaldar men basylymdardy erkin oqý úshin bizge aǵylshyn tilin bilý qajet. Qazaqtar orys tili arqyly mádenıet pen ǵylymnyń úlken álemine jol ashty, bizge bul tildi umytýdyń qajettiligi qansha? Ol bizde bar. Qarańyzshy, biz qazir qaı tilde áńgimelesip otyrmyz?! Jastardy ósirip, qanat qaqtyrý - kez kelgen prezıdenttiń róli. Eń qıyny jáne úlken qatelikter adam tańdaýda bolady. Adamdy ol jetistikke jetetin salaǵa qoıý - óner», - dep túıdi oıyn Elbasy.
