Nazarbaev Ýnıversıtetinde stýdent qyz qaıtys boldy

ASTANA. KAZINFORM — Nazarbaev Ýnıversıtetinde stýdent qyzdyń qaza tapqanyna baılanysty ýnıversıtet ákimshiligi resmı málimdeme jasady.

— Nazarbaev Ýnıversıteti jataqhanalarynyń birinde bolǵan qaıǵyly oqıǵaǵa baılanysty marqumnyń týystary men jaqyndaryna kóńil aıtamyz. Ýnıversıtet ujymy otbasyna moraldyq jáne materıaldyq qoldaý kórsetip jatyr, — delingen oqý ornynyń baspasóz qyzmeti taratqan habarlamada.

Ýnıversıtet málimetinshe, qazirgi ýaqytta oqıǵa boıynsha quzyrly organdar tergeý júrgizip jatyr. Oqıǵa ornyna quqyq qorǵaý organdarynyń qyzmetkerleri men psıhologter tartylǵan.

— Barlyq qajetti sharalar qolǵa alyndy. Ýnıversıtet ákimshiligi jaǵdaıdy erekshe baqylaýǵa aldy, — delingen habarlamada.

Sondaı-aq ýnıversıtet pen marqumnyń týystary jalǵan nemese rastalmaǵan aqparat taratpaýǵa shaqyrady. Jaqyndary bul qaıǵyly jaǵdaıdy buqaralyq aqparat quraldarynda, áleýmettik jelilerde jáne messendjerlik toptarda jarııalamaýdy surap otyr.

Buǵan deıin Túrkistan oblysynda kolledj stýdentin óltirý kúdigimen shetel azamaty ustalǵanyn jazǵanbyz.