Nazarbaev ýnıversıtetiniń jas ǵalymy Homo naledi dep atalatyn buǵan deıin beımálim adam túrin ashýǵa qatysty
ASTANA. QazAqparat - Nazarbaev ýnıversıtetiniń jas ǵalymy Zakarı Kofrman osyǵan deıin beımálim bolǵan Homo naledi dep atalatyn adam túrin ashýǵa qatysty. Qazaqstanǵa qaıtyp oralǵan ol búgin BAQ ókilderine suhbat berdi.
Onyń atap ótýinshe, ótken jyly Ońtústik Afrıkada «Jańa týyp kele jatqan juldyz» dep atalatyn úńgirden ejelgi adamnyń belgisiz túriniń súıekteri tabylǵan. Onda balalardan bastap qarttarǵa deıingi 15 ındıvıdýýmǵa tıesili 1500-den astam súıekter tabylǵan. Tabylǵan súıekterdi zertteýshi Lı Berger aǵymdaǵy jyldyń kókteminde fragmentterdi tereńirek zerttep, taldaý úshin «Jańa týyp kele jatqan juldyz» dep atalatyn semınarǵa jas ǵalymdardy shaqyrǵan. Osy habarlandyrýdy kórip, túıindemesin jibergen Z.Kofman araǵa biraz ýaqyt salyp, zertteýshilerdiń sapyna qosylǵan.
«Men adamnyń ósýi men damýyn zertteýmen aınalysqandyqtan, adam súıeginiń barlyq bólikterimen jumys isteýge týra keldi. Birinshi kúni zerthanany aralap, tabylǵan súıekterdi qarap júrip mundaıdy eshkim áli kórmegenine kózim jetti. Bas súıegi tik júretin adamdiki sııaqty, alaıda ólshemi jaǵynan óte shaǵyn. Homo naledi-diń qaıta qalpyna keltirilgen mıynyń ólshemi qazirgi zamanǵy adam mıynyń shamamen úshten birin quraıdy», - dedi ol.
Onyń sózine qaraǵanda tabylǵan súıekterdiń keıbiri avstralopıtekterdiń, al keıbir bólikteri qazirgi adamnyń súıekterine uqsaıdy.
«Bir aıǵa sozylǵan zertteýdiń barysynda men negizinde jetkinshektiń jambas súıekterimen jumys istedim. Sonymen qatar tister men súıekterdiń kóptegen úlgilerine kómilgen ındıvıdter sanyn anyqtaýǵa tyrystym. Nátıjesinde biz Dianaledi kamerasynda 15 ındıvıd boldy degen tujyrymǵa keldik», - dedi Z.Kofran.
