Nazarbaev Ýnıversıtetiniń janynan Medıtsına mektebi ashyldy (FOTO)
ASTANA. QazAqparat - «Nazarbaev Ýnıversıtetiniń» janynan joǵary medıtsınalyq bilim beretin Medıtsına mektebi ashyldy. Pıttsbýrg Ýnıversıtetimen aradaǵy áriptestik aıasynda ashylǵan Medıtsına mektebi 20 stýdent pen 23 oqytýshyny Bıomedıtsına ǵylymdarynyń kafedrasyna qabyldap ta úlgergen.
«Jalpy, bul jobanyń maqsaty Ortalyq Azııa boıynsha bıomedıtsınanyń habyn qurý. Kórip otyrǵanymdaı, Medıtsına mektebinde ınfraqurylym, tıisti resýrstar jáne eń bastysy talapty stýdentter bar»,-dedi jańadan ashylǵan mekteptiń dekany - Glazgo ýnıversıtetiniń Medıtsına mektebiniń dekany, tanymal patomorfrolog jáne bıomedıtsına salasynyń jasýsha adgezııasyn zertteıtin mamany doktor Massımo Pınatellı.
Medıtsına mektebiniń ashylý saltanatyna qatysa otyryp, QR Densaýlyq saqtaý jáne áleýmettik damý vıtse-mınıstri Alekseı Tsoı bul mektep Qazaqstannyń damyǵan elderdiń qataryna qosylýdaǵy maqsatyn oryndaýǵa úles qosady dep atap ótti.
Jańa Medıtsına mektebine qabyldanǵan stýdentter kópshilik aldynda Gıppokrat antyn qabyldady.
