Nazarbaev Ýnıversıtetiniń janynan Innovatsııalyq-ıntellektýaldyq klaster qurý bastaldy

Búgin Senatta «Ǵylym týraly» QR Zańynyń jáne Údemeli ındýstrııalyq-ınnovatsııalyq damyý jónindegi  2010-2014 jyldarǵa memlekettik baǵdarlamanyń iske asyrylýy aıasynda ǵylym damýynyń jaı-kúıi men perspektıvalary» taqyrybyna arnalǵan konferentsııa barysynda sóz sóılegen Bilim jáne ǵylym mınıstri Baqytjan Jumaǵulov osylaı málim etti.

 «Ǵylymnyń ınnovatsııalyq ınfraqurylymy qarqyndy damýda. Osyǵan oraı, Elbasynyń tapsyrmasy boıynsha Nazarbaev Ýnıversıtetiniń janynan Innovatsııalyq-ıntellektýaldyq klaster qurý bastaldy. Keıin onyń tájirıbesi Qazaqstannyń basqa ǵylymı-bilim ortalyqtaryna taratylatyn bolady», - deıdi mınıstr. Onyń aıtýynsha, qazirgi ýaqytta elimizde 10 ınnovatsııalyq ýnıversıtet iriktelgen. Olar memleket qoldaýyna ıe bolyp ta otyr.

Budan bólek, mınıstr B. Jumaǵulov zertteýlerdi kommertsııalaýdyń tıimdi júıesin qurýǵa erekshe kóńil bólinetinin de atap ótti.

«Bul arada ozyq álemdik tájirıbe paıdalanylady. Ǵylym men óndiris arasyndaǵy mańyzdy baılanystyrýshy býyndardyń biri - «Parasat» holdıngi. Holdıngte 2011 jyldan bastap sońǵy  praktıkalyq nátıjege baǵyttalǵan jobalar iske  asýda. Sonymen qatar, Dúnıejúzilik bankpen birlesip «Tehnologııalardy kommertsııalandyrý» jobasy júzege asýda. Budan bólek, Indýstrııa jáne tehnologııalar mınıstrligimen birge 7 joǵary oqý ornynda jáne 2 ǵylymı zertteý ınstıtýtynda 9 kommertsııalaý  keńsesi quryldy. Qazir, osy barlyq jańa mehanızmderdi ázirleý kezeńi aıaqtaldy. Endigi basty mindet - ekonomıkaǵa ǵylymdy naqty engizip, joǵary nátıjege  qol jetkizý», - dedi mınıstr.