Nazarbaev Ýnıversıtetiniń túlekteri jańǵyrtý jolynda aıanbaı qyzmet etedi - Elbasy
ASTANA. QazAqparat - Elbasy bıyl Nazarbaev Ýnıversıtetin támamdaǵan túlekterdi quttyqtap, doktorantýra baǵdarlamasynyń alǵashqy toǵyz túlegine dıplomdaryn tabystady, dep habarlaıdy QazAqparat.
«Búgin sizder men bizder úshin óte erekshe kún. Ýnıversıtet túlekteriniń úshinshi tobyn úlken ómirge attandyrǵaly turmyz. Halyqaralyq EKSPO kórmesiniń ashylýy qarsańynda osy shara ótkizilip otyr. Álemdik deńgeıdegi oqý ornynda bilim alý árbir adam úshin asqaq abyroı, mereıli mártebe dep sanaý kerek. Barshańyzdy dıplom tapsyrý rásimine oraı shyn júregimmen quttyqtap, úlken tabys pen baqyt tileımin»,-dedi Memleket basshysy Nursultan Nazarbaev saltanatty shara barysynda.
Bıyl oqý bitirgen stýdentter sany 737 adam,onyń ishinde bakalavrıat baǵdarlamasy boıynsha 499 túlek, magıstratýra baǵdarlamasy boıynsha 229 stýdent jáne PhD dárejesine ıe bolǵan doktorantýra baǵdarlamasynyń eń alǵashqy 9 túlegi bar. Erekshe úlgidegi dıplomǵa 75 túlek ıe boldy.
Prezıdent bul Ýnıversıtet Táýelsizdik jyldarynda qabyldanǵan asa mańyzdy jobanyń biri bolyp sanalatyn, ol bilim berý júıesinde ǵylymǵa negizdelgenin atap ótti.
«Ókinishke qaraı bundaı oqý orny Qazaqstanda buryn bolǵan joq. Ashylǵanyna bar bolǵany jeti jyl ǵana tolǵan oqý orny elimizde jáne álemdegi asa bedeldi bilim oshaqtarynyń birini aınalyp úlgerdi. Osy oraıda álem elderiniń irgeli oqý oryndarynyń tańdaýly mamandaryn shaqyrdyq. Dúnıejúzine Astananyń bilim men ǵylymnyń ortalyǵy ekenin kórsetip jatyrmyz. «Qazaqstannyń úshinshi jańǵyrýy atty» Joldaýymdy júzege asyrýda ýnıversıtettiń atqaratyn róli óte zor bolmaq. Oqý ornynyń túlekteri jańǵyrtý jolyna túsken Táýelsiz Qazaqstanǵa aıanbaı qyzmet isteıdi dep senemin, sondyqtan sol úshin osy Ýnıversıtetti salyp, sizderdi oqyttyq»,-dedi Elbasy.
