Nazarbaev Ýnıversıtetiniń túlekteri qaı salada eńbek etip júr
ASTANA. QazAqparat - Nazarbaev Ýnıversıtetiniń Prezıdenti Shıgeo Katsý kezekti oqý jylynyń aıaqtalýyna baılanysty baspasóz máslıhatyn ótkizdi, dep habarlaıdy QazAqparat tilshisi.
Onyń aıtýynsha, 2018 jyly bul oqý ordasyn 811 túlek bitirip shyǵady. Onyń ishinde 506 stýdent - bakalavr, 302 - magıstr jáne 3 adam - PhD doktory dárejesin almaq.
«2017 jyly Nazarbaev Ýnıversıtetin 737 adam bitirgen edi, demek bıylǵy túlekter sany 10 protsentke artyp otyr. Ótken jyly Prezıdent Nazarbaev 2025 jylǵa qaraı stýdentter sanyn eki esege kóbeıtýdi tapsyrǵan edi. Bul tapsyrma boıynsha jumystardy bastap kettik. Qazirgi ýaqytta oqý ornyn 750-800 túlek bitirip shyqsa, 2025 jylǵa qaraı bakalavrlar sanyn 5 200-5 300-ge deıin ósiremiz. Sonymen birge, ǵylymı-zertteý jumysyn qarqyndy damyp jatqandyqtan, PhD doktoranttary sanyn arttyrýdy kózdep otyrmyz», - dedi Shıgeo Katsý Nazarbaev Ýnıversıtetinde ótken baspasóz máslıhatynda.
Sondaı-aq, JOO basshysy atalǵan maqsattarǵa qol jetkizý úshin qajetti aýdıtorııalar men jataqhana ornyn kóbeıtý kerektigin basa aıtty.
«Bıyl ýnıversıtetimizde tek ǵana ǵylymı zerthanalar ornalasatyn jańa ǵımarat ashylady. Bul jańa ǵımarat ta 2025 jylǵy jospardy oryndaýǵa óz septigin tıgizedi», - dep atap ótti ol.
Odan bólek, Shıgeo Katsý túlekterdiń jumyspen qamtylýy týraly jýrnalıster suraǵyna jaýap berdi.
«NÝ túlekterine Qazaqstanda qalý mindeti qoıylmaıdy. Túlekterimiz óz bilimin jalǵastyrý úshin shetelge de ketip jatyr. Qazaqstanda tabysty eńbek etip júrgender bar. Olar kóbinese qarjy salasyn, iri konsaltıng kompanııalardy tańdaǵan. Kópshiligi óz bıznesin ashyp jatyr, bul da bizdi qýantady», - dep jaýap berdi Shıgeo Katsý.
