«Nazarbaev Ýnıversıtetiniń» tájirıbeleri taratylatyn 18 joǵary oqý orny anyqtaldy
ASTANA. 21 qyrkúıek. QazAqparat - «Nazarbaev Ýnıversıteti» elimizdiń joǵary bilim júıesiniń jańa «ósý núktesi» retinde anyqtalyp otyr.
Bul oqý ornynyń ǵylymı-bilim tájirıbeleri elimizdiń 18 ýnıversıtetine taratylatyn bolady, dep habarlaıdy Pm.kz saıty.
Bilim jáne ǵylym mınıstrliginiń aqparaty boıynsha, aǵymdaǵy jyly «Nazarbaev Ýnıversıtetiniń» tájirıbelerin taratý úshin 18 bazalyq joǵary oqý orny anyqtalyp otyr. Bul álemdik bilim men ǵylym júıesine yqpaldasýǵa jáne Bolon úderisi qaǵıdalaryn júzege asyrýǵa jasalǵan taǵy bir qadam bolmaq.
Joǵary oqý oryndaryna 2013 jyldan bastap birtindep avtonomııa berý máselesi qarastyrylýda. 2012 jyldan bastap elimizdiń 4 jetekshi ýnıversıtetinde ókilettikteri zań boıynsha belgilengen baqylaý keńesteri jumys isteýde. «Nazarbaev Ýnıversıtetiniń» tájirıbesin taratýdaǵy mańyzdy faktor - kóp tildi kadrlar daıardaý, tilderdiń úsh tuǵyrlyǵyn damytý bolyp tabylady. Ol úshin bıyldan bastap 32 joǵary oqý ornynda 5,5 myńnan astam stýdentti qamtyǵan arnaıy bólimder ashylýda. Oǵan qosa, jetekshi halyqaralyq sarapshylardy tarta otyryp, joǵary mektep top-menedjerlerin daıarlaý jobalary qolǵa alynýda.
«Nazarbaev Ýnıversıtetiniń» bazasynda synaqtan ótkizilgen bilim baǵdarlamalary, ǵylymı zertteýler júrgizýdiń jańa standarttary, avtonomııalyq jáne akademııalyq erkindik qaǵıdalary, bári-bári birtindep elimizdiń barlyq oqý oryndaryna taratylatyn bolady.
Qazir «Nazarbaev Ýnıversıtetinde» Ýnıversıtetke daıarlyq ortalyǵy (Foundation baǵdarlamasy) jáne 18 mamandyq boıynsha bakalavrıat baǵdarlamalaryn oqytatyn Injenerııa, Ǵylym jáne tehnologııalar, Gýmanıtarlyq jáne áleýmettik ǵylymdar mektepteri jumys isteıdi.
Oǵan qosa, Ýnıversıtette úsh joǵary mektep (Joǵary bıznes mektebi, Joǵary memlekettik saıasat mektebi, Joǵary bilim mektebi) qurylǵan. Al aldaǵy jeltoqsan aıynda oqý ornynda alǵashqy magıstrlik baǵdarlama - Executive MBA baǵdarlamasy (Basqarýshylarǵa arnalǵan bıznes-ákimılendirý) qolǵa alynbaq.
Aıta ketý kerek, 2012/2013 oqý jylynda ýnıversıtette bakalavrıattyń 1-shi kýrsynda - 510 stýdent, bakalavrıattyń 2-shi kýrsynda - 456 stýdent, Foundation baǵdarlamasy boıynsha 500-den astam stýdent oqýlaryn bastaıdy.
Sonymen qatar, aǵymdaǵy jyly «Nazarbaev Ýnıversıteti» ýnıversıtetke daıarlyq baǵdarlamasyna qatysýsyz bakalavrıat baǵdarlamasyna 28 adamdy oqýǵa qabyldady, taǵy 2 adam elimizdiń basqa oqý oryndarynan aýysyp keldi.
Elbasynyń bastamashylyǵy boıynsha «Nazarbaev Ýnıversıtetine» Qazaqstannyń bilim jáne ǵylym júıesin halyqaralyq deńgeıge shyǵarý jáne salany damytý mindeti júktelip otyr. Ýnıversıtet ınnovatsııalyq baǵdarlamalar men ǵylymı jobalar synaqtan ótetin alańǵa aınalýda.
