Nazarbaev ýnıversıtetiniń stýdentteri Qazaqstannyń Halyq sýretshisi Á.Ysmaıylovtyń shyǵarmashylyǵymen tanysty
ASTANA. 21 qańtar. QazAqparat - Nazarbaev ýnıversıtetinde QR Halyq sýretshisi Áýbákir Ysmaıylovtyń shyǵarmashylyq keshi ótkizildi.
Atalǵan shara Qazaqstannyń halyq sýretshisi, kınoakter, horeograf Áýbákir Ysmaıylovtyń júz jyldyǵyna arnalyp otyr. Kesh basynda sýretshiniń urpaqtary, ýnıversıtet oqytýshylary men stýdentteri rejısser A.Berkovıchtiń Á.Ysmaıylov týraly «Áýkeń. Ómir órnekteri» atty mereıtoılyq fılmin tamashalady.
«Bizdiń ýnıversıtetimiz jas kóshbasshylardyń jańa býynyn tárbıeleýdi maqsat tutady. Al rýhanı qundylyqtarsyz tutas tulǵany tárbıeleý múmkin emes. Osy is-shara tikeleı jáne jalpy alǵanda bizdiń stýdentterimizdiń rýhanı tutastyǵyn qalyptastyrýǵa baǵyttalǵan jáne Áýbákir Ysmaıylov sııaqty álemdik ataǵy bar Qazaqstan mádenıetiniń asa kórnekti qaıratkeriniń shyǵarmashylyǵymen tanysý, ulttyń paıym-parasaty joǵary bolashaq býynyn qalyptastyrýǵa ólsheýsiz úles qosady», - deıdi Nazarbaev Ýnıversıtetiniń vıtse-prezıdenti Qadısha Daırova.
Áýbákir Smaıylov - ejelgi kóshpendilerdiń ańyz-qııalǵa toly shynaıy ómirin batyl beınelegen sýretshi. Onyń qylqalamynan qazaq tarıhynyń kórnekti ókilderi - Kenesary han, hakim Abaı, kúı atasy Qurmanǵazy men jyr alyby Jambyl syndy uly tulǵalardyń obrazdary jasalyp shyqty.
