Nazarbaev Ýnıversıtetiniń stýdentteri ǵylymı jobalar baıqaýynda kezekti ret jeńiske jetti
ASTANA. 24 mamyr. QazAqparat - Nazarbaev Ýnıversıtetiniń stýdentteri eki jyl qatarynan «Astana Startup Weekend» konkýrsynyń jeńimpazy bolyp otyr.
Bıylǵy jyly qazylar alqasy sańyraýqulaqtardyń erekshe túri arqyly qoqys qaldyqtaryn joıý jobasyn eń úzdik dep tanydy. Jobanyń avtorlary - birinshi kýrs stýdentteri Álibek Moldaqojaev pen Aqerke Amangeldına. Olar 500 myń teńge aqshalaı syıaqy aldy. Bul týraly JOO-nyń Kommýnıkatsııa jáne marketıng departamentinen málim etti.
Aqerke Amangeldına - «ekonomıka», Álibek Moldaqojaev «bılogııa» mamandyǵy mamandyǵy boıynsha bilim alady. Bul - Álibek Moldaqojaevtyń ekinshi jeńisi. Ótken jyly Foundation Daıyndyq baǵdarlamasynda oqyǵan Á. Moldaqojaev Baýrjan Ospanmen jáne Dıas Álimbaımen birge «Fly farm» jobasymen qustarǵa arnalǵan aqýyzdy jem shyǵarý fermasynyń baıqaýynda jeńimpaz bolǵan. Taǵy bir aıta keterligi, bıylǵy jyly «Robototehnıka jáne mehatronıka» mamandyǵynyń birinshi kýrsynda bilim alatyn Baýrjan Ospan «ASEMa-01» robotymen baıqaýdyń fınalyna shyqqan bolatyn.
Budan basqa, «Robototehnıka jáne mehatronıka» mamandyǵynyń birinshi kýrsynda oqıtyn stýdent Dıas Álimbaı sýıtsıdtiń aldyn alý jónindegi jobasymen qazylar alqasynyń nazaryna iligip, «Eń úzdik smart ıdeıalar» nomınatsııasynda erekshe atap ótildi. «One Life» jobasy joǵary deńgeıdegi sheshimi bar beıne jabdyqtardy paıdalana otyryp, emotsııalardy belgileý arqyly adamnyń mıkromımıkasyn sáıkestendirý boıynsha tehnologııalyq sheshim bolyp tabylady.
Innovatsııalar men joǵary tehnologııalar Nazarbaev Ýnıversıtetiniń bilim berý baǵdarlamalaryn negizin qurap otyr. Ýnıversıtettiń ınfraqurylymy, onyń ishinde jańa joǵary tehnologııalyq qural-jabdyqtarmen jabdyqtalǵan zerthanalar stýdentterge ǵylymı-zertteý jumystarmen birinshi kýrstan bastap aınalysýǵa múmkindik beredi.
