Nazarbaev Ýnıversıtetiniń ǵalymdary halal bıologııalyq belsendi qospa ázirledi
«Nazarbaev Ýnıversıtetiniń National Laboratory Astana (NLA) Ómir týraly ǵylymdar ortalyǵynyń ǵalymdary qurǵaq bıe súti (saýmal), ósimdik jáne metabıotıkalyq komponentter negizinde jasalǵan jańa BBQ-ónim ázirledi. Jańa ónim «Saýmet» dep ataldy. Ol jańa 2019 jyl qarsańynda ashylǵan Qaraǵandy oblysy zaýytynyń jańa óndiristik jelisinde kapsýlalar túrinde shyǵarylady. Joba « Ǵylym qory» AQ qarjylyq qoldaýymen iske asyrylady», - delingen habarlamada.
Ǵalymdar antıbıotıkoterapııadan keıin mıkroflorany qalpyna keltirý úshin, sondaı-aq ártúrli kúızelis faktorlar men syrtqy ortanyń jaǵymsyz áserleri bolǵan kezde «Saýmet» preparatyn qoldanýdy usynady. Budan basqa, ázirleýshiler «Saýmettiń» halal standarttaryna sáıkes óndiriletinin atap kórsetedi.
«Dárilik nysandar men BBQ-qa arnalǵan kapsýlalardyń kóbi janýarlar jelatıni negizinde jasalady. Biz óndiris kezinde tek ósimdik shıkizatyn paıdalanamyz. Osylaısha, biz tek qana halal nemese vegetarıan tutynýshylardyń qalaýyn eskeremiz. Aldyn ala esepteýler boıynsha, preparattyń bir aılyq kýrsynyń quny 4 -7 myń teńgeni quraıtyn bolady. Preparattyń janama áseri joq», - dep habarlady «NLA» Ómir týraly ǵylym ortalyǵy, Adam mıkrobıomy jáne uzaq ómir súrý zerthanasynyń aǵa ǵylymı qyzmetkeri Samat Qojahmetov.
«Saýmet» kapsýlalar bıyl jyldyń ortasyna qaraı satylymǵa túsedi dep kózdelip otyr. Ǵalymdar qazirdiń ózinde ósimdik syǵyndylarymen, polıvıtamındermen jáne t.b. baıytylǵan «Saýmet» negizinde jańa ónimder shyǵarýdy josparlap otyr.
