Nazarbaev Ýnıversıtetiniń alǵashqy túlekterine dıplom tapsyrý sharasy ótip jatyr

2010 jyly Qazaqstan Prezıdentiniń bastamasymen qurylǵan bul oqý orny otandyq bilim berýdiń úzdik úlgisi bolyp tabylady. Bıyl ýnıversıtetti 446 stýdent támamdap otyr. Stýdentter kóbinese Gýmanıtarlyq jáne áleýmettik ǵylymdar mektebinde, Ǵylym jáne tehnologııalar mektebinde, Injenerııa mektebinde, Joǵary bıznes mektebinde, Joǵary memlekettik saıasat jáne Joǵary bilim berý mektepterinde bilim aldy.

«Búgin Nazarbaev Ýnıversıtetiniń alǵash túlekteri retinde úlken ómirge qadam basqaly otyrsyzdar. Sondyqtan búgingi aıtýly oqıǵa - biz úshin úlken mereke. Búgin Ýnıversıtettegi sizderdiń sońǵy kúnderińiz bolǵanymen, alaıda jarqyn bolashaqtaryńyz osy sátten bastalǵaly otyr. Keıbireýlerińiz ǵylym jolyn qýsańyzdar, qalǵandaryńyz memlekettik basqarý nemese bıznes jáne basqa salalarda qyzmet isteıtin bolasyzdar. Biraq ta bolashaqta barshalaryńyzdy Nazarbaev Ýnıversıteti dıplomy biriktiredi. Barshalaryńyzdy osy búgingi aıtýly mańyzdy kúnmen quttyqtaımyn!» -dedi QR Bilim jáne ǵylym mınıstri Aslan Sárinjipov.

Mınıstr quttyqtaý sózinde oqý ornynyń qurylǵan kúninen bastap qyzmet etip jatqan professorlyq-oqytýshylyq quramǵa alǵysyn bildirdi.

Taratylǵan málimetterge qaraǵanda, jalpy oqý orny ashylǵannan beri jeti mekteptegi stýdentter sany 2 800-ge deıin jetti. Jyl saıyn 500 adam oqý grantyna ıe bolýda. Magıstranttar men doktoranttar da memlekettik bilim berý tapsyrysy boıynsha bilim alady.

Aıta keteıik, búgin sonymen qatar Nazarbaev Ýnıversıtetiniń jańa bes qabatty ǵımaraty ashyldy. Bul nysan elordanyń Turan kóshesi boıynda ornalasqan.