Nazarbaev Ýnıversıtetine jumysqa qabyldaý sharttary qandaı
ASTANA. QazAqparat - Búgin joǵary bilim berý kóshbasshylarynyń VII Eýrazııalyq forýmynda (EHELF) Nazarbaev Ýnıversıtetine jumysqa qabyldaý sharttary talqylandy, dep xabarlaıdy QazAqparat tilshisi.
Ýnıversıtet provosty, professor Ilesanmı Adesıdanyń aıtýynsha, basty talap ol - kásibı daıyndyq. Úmitkerdiń ulty men násili eskerilmeıdi. "Árıne, biz álemniń túkpir-túkpirinde jumys istep júrgen qazaqstandyqtardyń óz eline qaıtqanyn qalaımyz. Olar shetelde professor bolyp júrip, atalǵan dárejeniń múmkindikterin tolyq paıdalana almasa, bizge kelip, tolyqqandy professor bola alady. Biz bilemiz, búginde Qazaqstannyń alty azamaty Izraıldiń Ben-Gýrıon atyndaǵy ýnıversıtette genetıkamen aınalysady. Ondaı azamattar kóp. Olar Qazaqstanǵa kelip, bizdiń baǵdarlamalarymyzǵa qatysady degen úmit bar", - deıdi I.Adesıda.
Al joǵary bilim berý mektebiniń dekany Aıda Saǵyntaevanyń sózine qaraǵanda, Nazarbaev Ýnıversıtetine "Bolashaq" baǵdarlamasynyń túlekteri jıi keledi. Olardy jumysqa almasa, qatty renjıdi. "Iá, olardy jumysqa almasa, keı kezde renjip ketedi. Árıne, men ózim Qazaqstan azamaty bolǵannan keıin jerlesterimdi keri qaıtarǵan ońaı emes. Biraq men ylǵı aıtamyn, bizge kásibı mamandar qajet. Al olardyń qaı elden kelgeni mańyzdy emes. Sondyqtan "osy jerdiń azamatymyn" degendi saýdaǵa salýdyń qajeti joq. Óıtkeni básekelestik kezinde adamnyń ulttyq erekshelikteri emes, jeke qarym-qabiletteri baǵalanady. Sondyqtan biz jergilikti úmitkerler úshin erekshe jaǵdaı jasamaýǵa kelistik. Barlyǵyna birdeı talaptar bar. Sony oryndaı bilý kerek", - dep atap kórsetti A.Saǵyntaeva.
Aıta keteıik, búgin Nazarbaev Ýnıversıtetinde joǵary bilim berý kóshbasshylarynyń VII Eýrazııalyq forýmy (EHELF) bastaldy. Bıylǵy forým joǵary bilim berý salasyndaǵy ınnovatsııalarǵa arnalyp otyr. Halyqaralyq sharaǵa otandyq jáne sheteldik ýnıversıtetterdiń ǵalymdary, top-menedjerler men strateg mamandar jınaldy. Olardyń ishinde Reseı, Rýmynııa, AQSh, Qyrǵyzstan, Qytaı, Avstralııa jáne taǵy basqa joǵary oqý oryndarynyń ókilderi bar. Ekikúndik májilis kezinde forým qatysýshylary ozyq texnologııalar arqyly bilim berý salasyn jańǵyrtý máselelerin talqylaıdy.
Alǵashqy sessııada Halyqaralyq sarapshy Djamıl Salmı joǵary bilim berý salasynyń qalaısha ózgeretinine boljam jasady.
