Nazarbaev ýnıversıtetine jańa basshy kelgen soń qarjylyq qyzmetine analız jasalady

ASTANA. QazAqparat –Ǵylym jáne joǵary bilim mınıstri Saıasat Nurbek Astana halyqaralyq forýmynyń kýlýarynda Nazarbaev ýnıversıtetin qandaı ózgerister kútip turǵanyn aıtty, dep habarlaıdy QazAqparat tilshisi.

«Qazirgi tańda tek qana bir ózgeris bar. Nazarbaev ýnıversıteti týraly zań ózgerip jatyr. Úkimettiń, bizdiń mınıstrliktiń negizgi maqsaty – ýnıversıtettiń áleýetin saqtap qalý jáne ony myqty zertteý deńgeıine shyǵarý. Negizgi basym josparymyz – zertteý áleýetin kóterý. Nazarbaev ýnıversıtetinde óte myqty toǵyz zerthana bar. Eń myqty professorlar, oqytýshylar shoǵyrlanǵan. Maqala turǵysynan, ǵylymı pýblıkatsııa turǵysynan eń birinshi deńgeıde tur. Biraq qoldanbaly, salalyq zertteýler azdaý. Shyny kerek ulttyq kompanııalarymyzǵa, salalyq kompanııalarymyzǵa, óndiriske qoldanbaly úlesi áli azdaý», - dedi mınıstr.

Onyń sózinshe, ýnıversıtetti qarjylandyrý tártibi sol kúıinde qalady.

«Avtonomdyq quqyǵy shektelmeıdi. Óıtkeni jınalyp qalǵan potentsıaldy shaıqap, tógip almaýymyz kerek. Qalyptasqan kadrlardy, sol jerge quıylǵan aqshanyń arqasynda paıda bolǵan myqty zerthanalardy tógip almaýymyz. Qarjylandyrý tártibi sol kúıinde saqtalady. Biraq qazir analızin jasaýymyz kerek. Sol analızdiń qorytyndysyna qaraı kóremiz. Bilesizder, basshylyǵy aýysady. Úlken konkýrs jarııalanady. Sol konkýrs negizinde ǵana basshylyq taǵaıyndalyp, sodan keıin analız jasalady», - dedi Saıasat Nurbek.